Wednesday, 29 İyun 2022 22:42
Yeni Azərbaycan Televiziyası
Bakı
İstanbul
Moskva
Azərbaycanda bəzi maya növlərinə gömrük rüsumu tətbiq olunacaq

Azərbaycanda bəzi maya növlərinə gömrük rüsumu tətbiq olunacaq

Aktiv mayalardan maya kulturaları, quru və çörəkçilik mayaları istisna olmaqla, digərlərinə 15 faiz idxal gömrük rüsumu tətbiq olunacaq.

YAZTV xəbər verir ki, Nazirlər Kabineti bununla bağlı Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələrində müvafiq qərarında dəyişiklik edilib.

Xatırladaq ki, bundan əvvəl maya kulturaları, quru və çörəkçilik mayaları ilə bərabər, digər aktiv mayalara da idxal gömrük rüsumu tətbiq olunmayıb.

İsmayıllı rayonunun ümumtəhsil məktəblərində “Son zəng” tədbirləri keçirilib

İsmayıllı rayonunun ümumtəhsil məktəblərində “Son zəng” tədbirləri keçirilib

İyunun 14-də bütün respublikada olduğu kimi İsmayıllı rayonunun məktəblərində də “Son zəng” tədbirləri keçirilib.
Rayonun ümumtəhsil məktəblərində keçirilən "Son zəng" tədbirlərində İsmayıllı Rayon İcra Hakimiyyətinin başçısı, idarə, müəssisə, təşkilat rəhbərləri və ictimaiyyət nümayəndələri iştirak edib.
E. Məmmədov adına İsmayıllı şəhər 3 nömrəli məktəb-liseyində keçirilən “Son zəng” tədbirində rayon rəhbəri Nahid Bağırov iştirak edib. Tədbir iştirakçıları əvvəlcə şəhidlərin xatirəsinə ucaldılmış abidəni ziyarət edib, önünə gül dəstələri qoyublar.
 
Dövlət Himninin səsləndirilməsi ilə başlayan tədbirdə çıxış edən RİH başçısı məzunları, onların müəllim və valideynlərini son dərs günü münasibətilə təbrik edib, ölkədə təhsil sahəsindəki inkişafdan, aparılan islahatlardan söz açıb. Çıxış edənlər məktəb kollektivinin və şagirdlərin qazandıqları uğurlar barədə məlumat verib, Azərbaycan təhsilinə göstərdiyi diqqət və qayğıya görə ölkə başçısı cənab İlham Əliyevə minnətdarlıqlarını bildiriblər və məzunlara ürək sözlərini çatdıraraq onlara müstəqil həyatda uğurlar arzulayıblar.
“Son zəng” tədbiri məktəblilərin hazırladıqları musiqili-bədii çıxışlarla davam edib.
 
Rayonunun digər məktəblərində də son zəng tədbirləri yüksək təşkilatçılıqla keçirilərək məzunların həyatında yaddaqalan bir günə çevrilib.
Məlumat üçün bildirək ki, rayonda 46 tam orta məktəb fəaliyyət göstərir. Bu il XI sinifi 732 məzun bitirib. Buraxılış imtahanlarında 24 məzun 250-dən çox bal toplayıb. Həmçinin XI sinif şagirdlərindən 7 nəfəri fənn olimpiyadasının qalibi olub.
 
Niyazi Bayramov vəfat edən hərbçinin yas mərasimində iştirak edib

Niyazi Bayramov vəfat edən hərbçinin yas mərasimində iştirak edib

Ötən gün, Azərbaycan Ordusunun giziri, Vətən müharibəsi iştirakçısı Ruzi Adil oğlu Qəmbərov xəstəlikdən vəfat edib. Bununla əlaqədar olaraq Gəncə Şəhər İcra Hakimiyyətinin başçısı Niyazi Bayramov yas mərasimində iştirak edib, məhrumun ailə üzvlərinə başsağlığı verib.

Qeyd edək ki, Ruzi Qəmbərov sol arxa beyin arteriyası hövzəsinin işemik insultu, serebral koma diaqnozu ilə hərbi tibb müəssisəsində müalicə alıb. Lakin həkimlərin səylərinə baxmayaraq onun həyatını xilas etmək mümkün olmayıb.

Ruzi Qəmbərov Vətən müharibəsi dövründə Murovdağ istiqamətində gedən döyüşlərdə iştirak edib. O, Prezident İlham Əliyevin müvafiq Sərəncamı ilə “Kəlbəcərin azad olunmasına görə” medalı ilə təltif edilib.

Allah rəhmət etsin!

İyun ayının pensiyaları ödənilərək tam yekunlaşdırılıb

İyun ayının pensiyaları ödənilərək tam yekunlaşdırılıb

Əmək və Əhalinin Sosial Müdafiəsi Nazirliyinin (ƏƏSMN) tabeliyində Dövlət Sosial Müdafiə Fondu respublika üzrə iyun ayının pensiyalarının ödənişini tam yekunlaşdırıb.

ƏƏSMN-dən YAZTV-yə verilən məlumata görə, iyunun 9-da Bakı və Sumqayıt şəhərləri, Abşeron rayonu, bu gün isə ölkəmizin digər bölgələri üzrə pensiyalar, habelə güzəştli şərtlərlə təyin edilmiş pensiyalar ödənilib.

Vətəndaşlar pensiyalarını bank kartları vasitəsilə müvafiq bankların bankomatlarından əldə edə bilərlər.

Sabahın hava proqnozu açıqlanıb

Sabahın hava proqnozu açıqlanıb

Bakıda və Abşeron yarımadasında iyunun 15-də hava şəraitinin dəyişkən buludlu olacağı, əsasən yağmursuz keçəcəyi gözlənilir.

Milli Hidrometeorologiya Xidmətindən YAZTV-yə verilən məlumata görə, lakin gecəyə doğru bəzi yerlərdə qısamüddətli az yağış yağacağı ehtimalı var.

Mülayim şimal-qərb küləyi əsəcək. Havanın temperaturu gecə 20-23° isti, gündüz 28-32° isti, Bakıda gecə 20-22° isti, gündüz 30-32° isti olacaq. Atmosfer təzyiqi normadan aşağı 756 mm civə sütunu təşkil edəcək. Nisbi rütubət 50-60 % olacaq.

Azərbaycanın rayonlarında sabah əksər rayonlarda hava əsasən yağmursuz olacaq, lakin gündüz bəzi şimal və qərb rayonlarında şimşək çaxacağı, arabir yağış yağacağı gözlənilir. Mülayim şərq küləyi əsəcək.

Havanın temperaturu gecə 18-22° isti, gündüz 31-36° isti, dağlarda gecə 8-13° isti, gündüz 16-21° isti olacaq.

DİN "Son zəng"lə bağlı valideyn və məzunlara müraciət edib

DİN "Son zəng"lə bağlı valideyn və məzunlara müraciət edib

Daxili İşlər Nazirliyi "Son zəng"lə bağlı valideyn və məzunlara müraciət edib.

YAZTV xəbər verir ki, müraciətdə deyilir:

"Hörmətli valideynlər! Avtomobilinizi sürücülük hüququ olmayan yeniyetmələrə verməyin. Belə hallar aşkar olunduqda siz məsuliyyətə cəlb ediləcəksiniz.

Hörmətli məzunlar! Özünüzü kiçik səhvlərə qurban verməyin. Valideynləriniz və cəmiyyətimiz sizdən böyük uğurlar gözləyir".

İyun ayının sonunadək hava qeyri-sabit olacaq - XƏBƏRDARLIQ

İyun ayının sonunadək hava qeyri-sabit olacaq - XƏBƏRDARLIQ

Azərbaycanın rayonlarında iyun ayının ikinci ongünlüyünun sonunadək əsasən şimal və qərb rayonlarında qeyri-sabit hava şəraitinin davam edəcəyi gözlənilir.

Milli Hidrometeorologiya Xidmətindən  verilən məlumata görə, bəzi yerlərdə şimşək çaxacağı, fasilələrlə yağış yağacağı gözlənilir.

Qərb küləyi ayrı-ayrı yerlərdə arabir 18-23 m/s olacaq. Çaylarda sululuğun artacağı ehtimalı var.

QMİ: "Dezinformasiyalarla müsəlmanların müqəddəs hissləri, xalqın heysiyyatı ilə oynamaq haqsızlıqdır"

QMİ: "Dezinformasiyalarla müsəlmanların müqəddəs hissləri, xalqın heysiyyatı ilə oynamaq haqsızlıqdır"

Qafqaz Müsəlmanları İdarəsi bəyanat yayıb.

YAZTV-yə daxil olan bəyanatda deyilir:

"Azərbaycan dini-mənəvi dəyərlərinə dərin ehtiramı, dinlərarası anlaşma və mehriban qardaşlıq mühitinin hökm sürməsi ilə tanınan dünyəvi, hüquqi-demokratik dövlətdir. Ölkə Konstitusiyasına görə, bütün dinlər bərabər hüquqlara malikdir. Ateizm ideologiyasından qurtulmuş müstəqil Azərbaycanda milli-mənəvi dəyərlərimizin əsasında duran İslam dininə dövlət səviyyəsində xüsusi ehtiramlı münasibət bərqərar olmuşdur. Sovetlər dönəmində 17 məscidi olan Azərbaycanda müstəqillik dövründə 2000-dən artıq məscid, təqribən bu sayda imam dövlətin maddi dəstək və yardımı ilə fəaliyyət göstərir. Bütün ölkə boyunca, o cümlədən, işğaldan azad olunmuş ərazilərimizdə bərpa edilən və yenidən qurulan dini-mənəvi abidələrimiz, bütün dinlərə məxsus ibadətgah məkanları dövlətin ali diqqətinin təzahürüdür. Dövlət səviyyəsində həyata keçirilən bu işlərin şahidi bütün dünya ictimaiyyətidir. Həqiqət göz önündədir. Müqəddəs Kitabımız Qurani-Kərimdə buyurulduğu kimi: "Yaxşı işlər görün! Allah, Onun Peyğəmbəri və möminlər əməllərinizi görəcəklər" (Tövbə, 105).

İslam dəyərlərinin ümumbəşəri əhəmiyyətinə önəm verən, müqəddəs dinimizin sülhsevər mahiyyətinin dünya miqyasında təbliği və müdafiəsi istiqamətində əməli səylər göstərən dövlət başçımız İlham Əliyev Azərbaycanda Multikulturalizm ili, ardınca İslam Həmrəyliyi ilini elan etməklə öz müdrik qərarları və müəllifi olduğu Bakı prosesi ilə dünya miqyasında dinlərarası dialoq, sivilizasiyalararası əməkdaşlıq işinə böyük töhfələr verməkdədir. Azərbaycan dövləti dünyanın istənilən nöqtəsində İslamın müqəddəs məkanlarına, rəmz və şəxsiyyətlərinə qarşı hər hansı hörmətsizliyə, etnik, dini qarşıdurmalara yol açan nifrət çağırışlarına hər zaman qətiyyətli etiraz səsini ucaldır. Azərbaycanın dövlət rəhbəri islamofobiya meyllərinə qarşı öz qətiyyətli mövqeyini beynəlxalq aləmdə ən uca xitabət kürsülərində – BMT-də və nüfuzlu qlobal forumlarda səsləndirir, öz ardıcıl əməlləri, səyləri ilə dini-mənəvi dəyərlərinə ehtiramını xalqımıza və dünya ictimaiyyətinə nümayiş etdirir.

Yüz illərdir ayrı-ayrı xalqların və dinlərin mənsublarının mehriban ailə kimi yaşadığı Azərbaycanda din-dövlət münasibətləri yüksək səviyyədədir, milli və dini tolerantlıq dövlət səviyyəsində dəstəklənir, etnik-dini müxtəliflik ölkəmizin milli sərvəti kimi dəyərləndirilir. Multikultural birgəyaşayış təcrübəmiz dünyada nümunəvi model olaraq təqdir olunur. İslam dünyasının mütərəqqi dövlətlərindən biri kimi tanınan, öz milli, dini-mənəvi dəyərlərini qoruyub inkişaf etdirən, bəşəri dəyərlərə önəm verən Azərbaycan dövlətinin əməli səyləri dünya miqyasında nüfuzumuzu artırır, bütün beynəlxalq müstəvilərdə mövqelərimizi möhkəmləndirir.

Təəssüf olsun ki, Azərbaycanda hökm sürən tolerantlıq və dinlərarası, məzhəblərarası harmoniya mühitində dövlətimizin uğurlarından narahat olan bəzi destruktiv qüvvələr tərəfindən ölkəmizdəki ictimai sabitliyi, vətəndaş birliyini pozmaq niyyəti ilə nifrət çağırışlarının gündəmə gətirilməsi, məzhəblərarası təfriqə yaratmaq istiqamətində istər daxildə, istər ölkə xaricində məqsədyönlü təxribat meylləri müşahidə olunmaqdadır. Beynəlxalq qurumlara və dünya ictimaiyyətinə ölkəmiz haqqında böhtan və qarayaxma xarakterli məlumatların ötürülməsi, Azərbaycanın demokratik imicinə qarşı heç bir obyektiv reallığa əsaslanmayan çirkin təbliğatın aparılması, cəmiyyətimizin ən dəyərli üzvləri - xalqımızın Vətən müharibəsindəki qələbəsi naminə canlarını fəda etməyə hazır olan, sağlamlığını itirən qəhrəman qazilərimizi təxribata çəkmək yönündə xaricdən idarə edilən və maliyyələşdirilən hərəkətlər də bu qəbildəndir.

Azərbaycan dövləti beynəlxalq aləmdə qazandığı siyasi-mənəvi uğurlara azərbaycançılıq məfkurəsi, tarixi etnik-dini tolerantlıq ənənələri, zəngin multikultural dəyərləri ilə, dinlərarası və məzhəblərarası nadir anlaşma şəraitini bərqərar etməklə nail olmuşdur. Azərbaycan dünyada unikal ölkələrdəndir ki, dindarları məzhəb fərqi qoymadan eyni məsciddə namaz qılır, ibadət və bayram günlərini birgə keçirirlər. Xalqımızın çoxəsrlik mental dəyərləri və dövlətimizin müdrik siyasəti sayəsində təşəkkül tapan bu reallıq qibtə ilə yanaşı, təəssüf ki, bəzi dairələrdə qıcıq yaradır. Milli birliyimizə, daxili həmrəyliyimizə xələl gətirmək niyyəti ilə məzhəblərarası anlaşma mühitimizi hədəfə alan məkrli qüvvələr ölkə daxilində və xaricdən idarə olunan bəzi sosial media şəbəkələrində məqsədyönlü iş aparmaqdadırlar. İslam adından məkrli siyasi məqsədlər üçün sui-istifadə edən, mənəvi dəyərləri məqsədyönlü şəkildə təhrif edən, dinin əsaslarından anlayışı olmayan bəzi sosial şəbəkə fəalları insanları yanlış yola istiqamətləndirmək üçün canfəşanlıq göstərirlər. Bəlli məqsədlər naminə düşmən dəyirmanına su tökmək, qərəzli dezinformasiyaları əldə bayraq edərək müsəlmanların müqəddəs hissləri, xalqın heysiyyatı ilə oynamaq haqsızlıqdır. Müqəddəs dinimiz İslam sülh, anlaşma, əmin-amanlıq dinidir. Mahiyyətində bəşəri dəyərlər duran dinimizin adından təxribatlar üçün sui-istifadə olunması yolverilməz əməl, günah işdir.

Müzəffər ordumuz, fədakər Azərbaycan əsgəri heç bir etnik, dini və məzhəb fərqinə məhəl qoymadan 44 günlük müqəddəs Vətən müharibəsində möhtəşəm birlik nümayiş etdirdi, öz Ali Baş Komandanının əmri və xalqımızın qələbə çağırışı ilə səfərbər olaraq, bir səngərdə, çiyin-çiyinə misilsiz qəhrəmanlıqlar göstərdi, mədəniyyət paytaxtımız Şuşanı, bütün Qarabağı otuz illik düşmən işğalından xilas etdi. Mübarək şəhidlərimizi milli, dini, məzhəbi mənsubiyyətindən asılı olmayaraq, bütün din xadimləri birlikdə torpağa tapşırdıq. Qafqaz Müsəlmanları İdarəsi hər bir Azərbaycan vətəndaşını haqq mücadiləmiz zamanı olduğu kimi, bu gün də monolit birliyimizi qorumağa, dinindən, məzhəbindən asılı olmayaraq eyni cəbhədə olmağa, dövlətçiliyimizin mənafelərini müdafiə etməyə, milli-mənəvi həmrəyliyimizi pozmağa yönəlik təxribatlara uymamağa çağırır. Qalib Azərbaycan xalqı öz mənəvi dəyərlərinin sahibidir, Qarabağda əsarətdən qurtardığı İslami dini irsinə sahib çıxan millətdir. Qədim dövlətçilik ənənələrinə malik Azərbaycan xalqı məhz milli-mənəvi dəyərlərinə sadiqliyi sayəsində özünün mövcudluğunu, milli özünəməxsusluğunu bugünədək qoruyub saxlaya bilmişdir. Bu gün də müdrik dövlət başçımızın rəhbərliyi ilə xalqımız, ölkə dindarları milli-mənəvi dəyərlərimizin keşiyindədir, onu yad təsir və təxribatlardan göz bəbəyi kimi qoruyur və hər zaman da qoruyacaq. Uca Allah Azərbaycanı hifz etsin!".

Bu gün onlar üçün “Son zəng” çalınacaq

Bu gün onlar üçün “Son zəng” çalınacaq

Bu gün Azərbaycanda 2021/2022-ci dərs ili başa çatır və bütün ümumi təhsil müəssisələrində “Son zəng” çalınacaq.

YAZTV xəbər verir ki, “Son zəng” tədbiri hər bir ümumi təhsil müəssisəsinin həyətyanı sahəsində, həyətyanı sahəsi olmayan ümumi təhsil müəssisələrinin idman və ya akt zallarında təşkil olunmalıdır.

Tədbirdə valideyn komitələri, valideyn-müəllim assosiasiyaları və ictimaiyyətin nümayəndələri iştirak edə bilər. “Son zəng” müddətində şagirdlərin təhlükəsizliyinin təmin olunması istiqamətində zəruri tədbirlər görüləcək.

Qeyd edək ki, 2021-2022-ci tədris ilində ölkənin ümumtəhsil məktəblərinin IX siniflərini 133 422 nəfər, XI siniflərini 91 188 nəfər şagird bitirəcək. IX sinfi bitirənlərdən 61 400 nəfəri qız, 72 022 nəfəri oğlan, XI sinfi bitirənlərdən 42 005 nəfəri qız, 49 183 nəfəri oğlandır.

2021-2022-ci tədris ilində ümumtəhsil məktəblərində fəaliyyət göstərən 5896 məktəbəhazırlıq qrupunu 100 529 nəfər uşaq başa vurub.

İsmayıllıda “Qurtuluşdan Zəfərə gedən yol” mövzusunda konfrans keçirilib

İsmayıllıda “Qurtuluşdan Zəfərə gedən yol” mövzusunda konfrans keçirilib

İyunun 14-də İsmayıllı rayon Heydər Əliyev Mərkəzində 15 İyun – Milli Qurtuluş Gününə həsr olunmuş “Qurtuluşdan Zəfərə gedən yol” mövzusunda konfrans keçirilib.
Konfransda İsmayıllı Rayon İcra Hakimiyyətinin əməkdaşları, hüquq-mühafizə orqanları, İsmayıllı Regional Mədəniyyət İdarəsinin rəisi, şəhid ailələri, qazilər, idarə, müəssisə və təşkilat rəhbərləri iştirak ediblər.
 
Azərbaycan Respublikası Dövlət Himninin səsləndirilməsi ilə başlanan konfransda Ulu Öndərin həyat və fəaliyyətinə həsr olunmuş videoçarx izlənilib.
Tədbirdə çıxış edən İsmayıllı Rayon İcra Hakimiyyəti başçısının müavini Sevil Əhmədova 15 iyun tarixinin əhəmiyyətindən danışaraq qeyd edibi ki, bu gün Heydər Əliyev ideyaları yaşayır. Onun siyasətini möhtərəm Prezidentimiz İlham Əliyev bütün sahələrdə qətiyyətlə davam etdirir. Cənab Prezident, Ali Baş Komandanın rəhbərliyi ilə qazanılan tarixi qələbə bu siyasətin parlaq nümunəsidir.
 
Çıxış edənlər Ulu Öndər Heydər Əliyevin ikinci dəfə siyasi hakimiyyətə gəlməsi ilə müasir Azərbaycanın tarixində yeni bir səhifə açılmasından, ölkədə olan xaos, böhran, vətəndaş müharibəsinin sona çatmasından, ölkənin bütün sahələrində inkişafın, quruculuq və canlanmanın getməsindən söz açıblar. Bildirilib ki, bu gün müasir, müstəqil Azərbaycanın memarı və qurucusu olan Heydər Əliyev tərəfindən qoyulan siyasi xətt onun varisi, Azərbaycan Respublikasının Prezidenti cənab İlham Əliyev tərəfindən uğurla davam etdirilir.
 
Niyazi Bayramov “Texnofest - Azərbaycan” və digər beynəlxalq müsabiqələrdə uğur qazanmış şagirdlərlə görüşüb

Niyazi Bayramov “Texnofest - Azərbaycan” və digər beynəlxalq müsabiqələrdə uğur qazanmış şagirdlərlə görüşüb

Gəncə Şəhər İcra Hakimiyyətinin başçısı Niyazi Bayramov “Texnofest – Azərbaycan”, XVII Beynəlxalq Jautika, Beynəlxalq Kimya və Beynəlxalq Mendeleyev olimpiadaları, “Sabahın alimləri” Respublika Müsabiqəsi və İSEF- Beynəlxalq Elm və Mühəndislik Sərgisində iştirak edərək uğur əldə edən şagirdlərlə görüşüb. Görüşdə Gəncə-Daşkəsən Regional Təhsil İdarəsinin müdiri Anar Qədiməliyev və şagirdlərin müəllimləri iştirak ediblər.


Niyazi Bayramov bildirib ki, Azərbaycanın gələcəyi savadlı və bacarıqlı gənclərin əllərindədir. Məhz buna görə də bu gün ölkəmizdə təhsilin inkişafına, ixtisaslı kadrların hazırlanmasına dövlət səviyyəsində xüsusi diqqət göstərilir. Şəhər rəhbəri şagirdləri əldə etdikləri nailiyyətlərlə bağlı təbrik edib, uğurlar arzulayıb və hədiyyələr təqdim edib.
Xatırladaq ki, “Texnofest – Azərbaycan” festivalında “DN4” layihəsi ilə iştirak edən Gəncə şəhər 26 nömrəli məktəb-liseyin şagirdi Nəzrin Budaqova və Fizika, riyaziyyat və informatika təmayüllü liseyin şagirdi Nuray Əliyeva "Baku skills" kateqoriyası üzrə I yerə, Gəncə şəhər Fizika, riyaziyyat və informatika təmayüllü liseyin "Metaverse" komandası isə II yerə layiq görülüb.

Nazirlik: “Azərbaycanda albinos insanların statistikası aparılmır”

Nazirlik: “Azərbaycanda albinos insanların statistikası aparılmır”

“Azərbaycanda albinizmdən əziyyət çəkənlərin statistikası aparılmır”.

YAZTV xəbər verir ki, bunu Səhiyyə Nazirliyinin mütəxəssis-eksperti dermatoveneroloq Vahid Mahmudov deyib.

O qeyd edib ki, albinizm irsi xəstəlikdir: “Təxminən 17 min nəfərdən biri məhz bu nadir rast gəlinən xəstəliklə dünyaya göz açır. Albinos insanların dərisi ultra bənövşəyi şüalara qarşı həssas olduğundan onlarda dəri yanıqları və xərçəngə yoluxma riski yüksək olur. Belə insanların ailə qurmasında heç bir problem görmürəm”.

Nazirlik rəsmisi bildirib ki, patologiyanı hamiləlik vaxtı aşkara çıxarmaq mümkün deyil: “Ancaq ailədə albinizm olan biri varsa, valideynlərin birinin geni vasitəsilə hamiləlik vaxtı testin aparılması mümkün ola bilər. Əgər evli cütlüklərin biri albinizm daşıyıcı olarsa, uşağın albinos olması ehtimalı 25 %-dir”.