Monday, 29 Noyabr 2021 03:24
Yeni Azərbaycan Televiziyası
Bakı
İstanbul
Moskva
Əmək və Əhalinin Sosial Müdafiəsi Nazirliyinə yeni vəzifələr verilib

Əmək və Əhalinin Sosial Müdafiəsi Nazirliyinə yeni vəzifələr verilib

Prezident İlham Əliyev 25 iyun 2021-ci il tarixli fərmanı ilə təsdiq edilmiş “Şəhid ailələri üzvlərinin, müharibə ilə əlaqədar xəsarət almış hərbi qulluqçuların və əlilliyi müəyyən edilmiş şəxslərin müraciətləri üzrə vahid əlaqələndirmə mərkəzlərində göstərilən xidmətlərin və həmin xidmətləri göstərən dövlət orqanlarının (qurumlarının) siyahısı”nda dəyişiklik edilməsi haqqında fərman imzalayıb.

YAZTV xəbər verir ki, fərmana əsasən, Əmək və Əhalinin Sosial Müdafiəsi Nazirliyinin göstərdiyi xidmətlərə şəhid statusu verilmiş şəxsin vərəsələrinə, müharibə ilə əlaqədar əlilliyi müəyyən edilmiş şəxslərə və hərbi xidməti vəzifələrinin yerinə yetirilməsi ilə əlaqədar xəsarət (yaralanma, travma, kontuziya) alan hərbi qulluqçulara dövlət icbari şəxsi sığortası üzrə sığorta ödənişlərinin verilməsi ilə bağlı müraciətlərin qəbulu əlavə edilib.

Səfərbərlik və Hərbi Xidmətə Çağırış üzrə Dövlət Xidmətinin göstərdiyi çağırışçılara müddətli həqiqi hərbi xidməti hansı hərbi hissədə keçdikləri barədə məlumat verilməsi xidməti isə müddətli həqiqi hərbi xidmətdə olmasına dair arayış verilməsi xidməti ilə əvəzlənib.

 

 

Gələn il Bakı metrosuna daha dörd yeni qatar gətiriləcək

Gələn il Bakı metrosuna daha dörd yeni qatar gətiriləcək

Gələn il Rusiyadan Azərbaycana daha dörd yeni metro qatarı gətiriləcək.

Bunu  "Bakı Metropoliteni" QSC-nin mətbuat katibi Bəxtiyar Məmmədov deyib.

O bildirib ki, həmin qatarların gətirilməsi gələn ilin yayın sonuna qədər başa çatdırılacaq və tənzimləmə-sınaq işlərindən sonra xəttə buraxılacaq.

"2019-cu ildə Rusiyanın "Metrovaqonmaş" müəssisəsi ilə bağlanmış müqaviləyə əsasən 3 il ərzində hər il metropolitenə 20 vaqon və ya 4 qatar tərkibi gətirilməsi nəzərdə tutulub.

Ötən illərdə sifariş vaxtında yerinə yetirilib. Gələn il də mütləq şəkildə 4 qatar gətiriləcək. Hazırda texniki şərtlərin hazırlanması istiqamətində işlər aparılır. Gələn ilin əvvəlindən bu şərtlər istehsalçı ilə müzakirə olunacaq və Bakı Metropoliteninin tələblərinə uyğun həmin qatarların istehsalına başlanılacaq", - B.Məmmədov deyib.

Metropoliten rəsmisi qeyd edib ki, Bakının özünəməxsus relyefi, coğrafiyası olduğundan qatarlarla bağlı xüsusi şərtlər var.

"Məsələn, kondisionerlərin quraşdırılması ilə bağlı bizim öz tələblərimiz olur. Vaqonların mühərriklərlə təmin olunması və digər məsələlərlə bağlı xüsusi şərtlərimiz var və bunlara əməl olunmalıdır. Çünki Bakı metrosu quruluş baxımından çox mürəkkəb olduğundan, bəzən də dünya standartlarından kənara çıxdığından şərtlərə əməl olunması çox vacibdir", - o bildirib.

Səhiyyə Nazirliyi vətəndaşlara xəbərdarlıq edib

Səhiyyə Nazirliyi vətəndaşlara xəbərdarlıq edib

Son günlər Səhiyyə Nazirliyi adından çıxış edən kiberdələduzlar tərəfindən istifadəçilərə “WhatsApp” üzərindən “spam” mesajlar göndərilir.

Bu barədə YAZTV-yə  nazirlikdən bildirilib.

Qeyd edilib ki, mesaj göndərən şəxs Səhiyyə Nazirliyi Depo Departamentinin insan resursları şöbəsinin baş koordinatoru Emil Hüseynov olduğunu iddia edir. Həmin şəxs vətəndaşların müxtəlif vakansiyalar üzrə müraciətlərinin müsbət dəyərləndirildiyini iddia edir və bunun təsdiqi üçün onlardan 58 manat ödəniş etməsini tələb edir.

Bildiririk ki, Səhiyyə Nazirliyində bu adda şöbə fəaliyyət göstərmir və göndərilən mesajlar həqiqəti əks etdirmir.

Vətəndaşlardan xahiş olunur ki, tanımadığı şəxslərdən gələn bu cür mesajlara inanmasınlar və heç bir halda ödəniş etməsinlər”, - deyə nazirlikdən bildirilib.

Azərbaycanda 1 924 nəfər COVID-19-a yoluxub, 23 nəfər ölüb

Azərbaycanda 1 924 nəfər COVID-19-a yoluxub, 23 nəfər ölüb

Azərbaycan Respublikasında koronavirus (COVID-19) infeksiyasına 1 924 yeni yoluxma faktı qeydə alınıb, 1 873 nəfər müalicə olunaraq sağalıb.

Nazirlər Kabineti yanında Operativ Qərargahdan  verilən məlumata görə, COVID-19 üçün götürülən analiz nümunələri müsbət çıxmış 23 nəfər vəfat edib.

İndiyədək ölkədə ümumilikdə 578 627 nəfərin koronavirus infeksiyasına yoluxması faktı müəyyən edilib, onlardan 543 200 nəfər müalicə olunaraq sağalıb, 7 709 nəfər vəfat edib, aktiv xəstə sayı 27 718 nəfərdir.

Son sutka ərzində yeni yoluxma hallarının müəyyənləşdirilməsi ilə əlaqədar 11 584, ötən müddət ərzində isə ümumilikdə 5 473 157 test aparılıb.

Sabah hava necə olacaq?

Sabah hava necə olacaq?

Noyabrın 25-də ölkə ərazisində gözlənilən hava şəraiti açıqlanıb.

Milli Hidrometeorologiya Xidmətindən  verilən məlumata görə, Bakıda və Abşeron yarımadasında arabir yağış yağacağı, gündüz tədricən kəsiləcəyi gözlənilir.

Güclü şimal-qərb küləyi gündüz mülayim şimal-şərq küləyi ilə əvəz olunacaq.

Abşeron yarımadasında havanın temperaturu gecə 5-7° isti, gündüz 7-10° isti, Bakıda gecə 5-7° isti, gündüz 7-9° isti olacaq.

Atmosfer təzyiqi 765 mm civə sütunundan 773 mm civə sütununa yüksələcək.

Nisbi rütubət 70-80 % olacaq.

Noyabrın 25-də gündüz Abşeron yarımadasında meteoroloji amillərin mülayim tərəddüdü gözlənilir ki, bu da meteohəssas insanlar üçün əsasən əlverişlidir.

Azərbaycanın rayonlarında arabir yağıntılı olacağı, bəzi yerlərdə qar yağacağı gözlənilir. Ayrı-ayrı yerlərdə intensiv olacağı ehtimalı var. Gecə və səhər saatlarında duman olacaq. Qərb küləyi gecə və səhər arabir güclənəcək. Havanın temperaturu gecə 2-6° isti, gündüz 7-12° isti, dağlarda gecə 3-6° şaxta, gündüz 0-3° şaxta olacaq.

Noyabrın 16-da şəhid olan hərbçilərin ailə üzvlərinə sosial ödənişlər təyin olunub

Noyabrın 16-da şəhid olan hərbçilərin ailə üzvlərinə sosial ödənişlər təyin olunub

Noyabrın 16-da dövlət sərhədində Ermənistanın təxribatları nəticəsində baş verən döyüş əməliyyatları zamanı Azərbaycan Ordusunun şəhid olan 7 hərbi qulluqçusunun ailələri sosial dəstək tədbirləri ilə əhatə olunub.

Bu barədə  Əmək və Əhalinin Sosial Müdafiəsi Nazirliyindən məlumat verilib.

Bildirilib ki, nazirliyinin əməkdaşları şəhidlərimiz - leytenant Niftəliyev Ümüd Oruc oğlu, gizir Cabbarov Orxan Hətəm oğlu, müddətdən artıq həqiqi hərbi xidmət hərbi qulluqçusu kiçik çavuş Əliyev Natiq Yusif oğlu, əsgər Ağayev Elçin Mərifət oğlu, əsgər Əlizadə Elmin Samir oğlu, əsgər Əliyev Elçin Ramil oğlu, əsgər Xəlilov Murad Qalib oğlunun ailələri ilə görüşərək onların sosial vəziyyətini öyrəniblər.

"Ailə üzvlərinə sosial təminat hüquqları, qanunvericilikdə onlar üçün nəzərdə tutulan güzəşt və imtiyazlar barədə məlumat verilib. 7 şəhidimizin 14 ailə üzvünə müraciətlərinə ehtiyac qalmadan, zəruri sənədlər toplanaraq Prezidentin aylıq təqaüdü və müavinət, ümumilikdə 15 ödəniş təyinatı həyata keçirilib", - məlumatda qeyd edilir.

Ölkədə vaksinasiya ilə bağlı son vəziyyət açıqlandı

Ölkədə vaksinasiya ilə bağlı son vəziyyət açıqlandı

Azərbaycanda son sutkada koronavirus (COVID-19) əleyhinə 34 474 vaksin vurulub.x

YAZTV   xəbər verir ki, bu barədə Nazirlər Kabineti yanında Operativ Qərargah məlumat yayıb.

Bir gündə birinci mərhələ üzrə vaksinasiya olunanların sayı 4 229, ikinci mərhələ üzrə vaksinasiya olunanların sayı 6 418, “buster” doza üzrə vaksinasiya olunanların sayı isə 23 827 nəfərdir.

Vurulan vaksinlərin ümumi sayı 10 363 317, birinci mərhələ üzrə vaksinasiya olunanların ümumi sayı 5 059 543, ikinci mərhələ üzrə 4 538 992, “buster” doza üzrə isə 764 782 nəfər təşkil edir.

Tanınmış hərbi həkim 42 yaşında vəfat etdi

Tanınmış hərbi həkim 42 yaşında vəfat etdi

Azərbaycanda tanınmış hərbi həkim, beyin cərrahı Azər Əkbərov vəfat edib.

YAZTV xəbər verir ki, 42 yaşlı həkimin onkoloji xəstəlik səbəbindən dünyasını dəyişdiyi bildirilir.

Qeyd edək ki, A. Əkbərov Müdafiə Nazirliyinin Mərkəzi Hərbi Klinik Hospitalında Cərrahiyyə ixtisası üzrə ilkin ixtisaslaşma kursu keçib. Türkiyənin Gülhanə Hərbi Tibb Akademiyasında uzmanlıq təhsilini başa vurub. O, həmin akademiyanı birinciliklə bitirib. Respublika Diaqnostika Mərkəzində həkim-neyrocərrah vəzifəsində çalışıb.

Azər Əkbərov tibb xidmət mayoru olub. Vətən Müharibəsində hərbi həkim kimi fəaliyyət göstərib.

Növbəti ilin buraxılış və qəbul imtahanlarının cədvəli hazırdır - DİM sədri

Növbəti ilin buraxılış və qəbul imtahanlarının cədvəli hazırdır - DİM sədri

Növbəti il üçün buraxılış və qəbul imtahanlarının tarixləri ilə bağlı cədvəl artıq hazırdır.

YAZTV-nin məlumatına görə, bunu Dövlət İmtahan Mərkəzinin (DİM) Direktorlar Şurasının sədri Məleykə Abbaszadə jurnalistlərə açıqlamasında deyib.

O bildirib ki, cədvəl Nazirlər Kabineti yanında Operativ Qərargah tərəfindən qəbul edildikdən sonra ictimaiyyətə təqdim olunacaq.

M.Abbaszadə qeyd edib ki, gələn il üçün magistratura səviyyəsinə sənəd qəbuluna yanvar ayından başlanılması nəzərdə tutulur:

"Lakin cədvəl təsdiqlənmədiyindən hələlik dəqiq tarix deyə bilmirəm. Qaydalara əsasən, magistraturaya qəbul adətən bir mərhələdə həyata keçirilir. Ötən il isə namizədlərə iki cəhd imkanı verdik. Əgər sərt karantin tədbirləri olmasa çalışacağıq ki, bu tədris ilində də belə bir imkan yaradaq", - DİM sədri deyib.

DİN piyada və sürücülərə müraciət etdib

DİN piyada və sürücülərə müraciət etdib

Daxili İşlər Nazirliyi (DİN) piyada və sürücülərə müraciət etdib.

DİN-dən  daxil olan məlumata görə, müraciətdə deyilir:

"Əziz həmvətənlər!

Yol-nəqliyyat hadisələri üzrə tərəfimizdən aparılan təhlillər göstərir ki, cari ilin 10 ayı ərzində respublika ərazisində baş vermiş qəzaların 42, Bakı şəhəri üzrə isə 57 faizini piyadaların vurulması təşkil edir. Araşdırmalar deməyə əsas verir ki, belə hallarda bu qəzalarda sürücülərlə yanaşı piyadaların da təqsiri olur.

Belə ki, bəzi piyadalar onların rahat və təhlükəsiz hərəkəti üçün nəzərdə tutulmuş piyada zolaqlarından, yeraltı və yerüstü piyada keçidlərindən istifadə etmirlər. Elə bunun nəticəsidir ki, piyada vurma hadisələrinin çoxu da məhz piyada keçidlərindən kənarda qeydə alınır.

Odur ki göstərilənləri nəzərə alaraq bir daha piyadalara səslənirik:

- küçə və yolları sizin üçün nəzərdə tutulan yerlərdən keçin;

- nizamlanan və ya nizamlanmayan piyada keçidlərindən istifadə edərkən yoldakı sürət həddini, hərəkətin intensivliyini, hava və görmə şəraitini, sürücülərin nəqliyyat vasitəsini dayandıra bilib-bilməyəcəyini nəzərə alın;

- məhdudiyyətli görünmə, duman, yağış, qar şəraitində, habelə sutkanın qaranlıq vaxtı xüsusilə diqqətli olun;

- yaxınlaşmaqda olan avtomobillərin sürətini düzgün qiymətləndirin, onların tam dayandığına, sürücülərin sizə yol verdiklərinə əmin olduqdan sonra hərəkətə başlayın;

- ictimai nəqliyyatı gözləyərkən və ya ona minib-düşərkən ehtiyatlı olun, həmçinin qəflətən avtomobil yoluna çıxmayın;

- yolu keçərkən mobil telefondan, eləcə də ətrafdakı avtomobillərin səsini vaxtında eşitmək üçün qulaqlıqdan istifadə etməyin.

Eyni zamanda, sükan arxasında olan sürücülər də yol hərəkətinin ən müdafiəsiz iştirakçıları sayılan piyadaların təhlükəsizliyi məsələsinə ciddi yanaşmalı, artıq yola çıxmış piyadaya yol verməli, piyadaların yola çıxma ehtimalı olan ərazilərdə, xüsusilə qaranlıq vaxtı və işıqlandırılmayan yollarda daha diqqətli olmalı, təhlükəli situasiyanı düzgün qiymətləndirməyi bacarmalıdırlar. Hər bir sürücü bilməlidir ki, ani diqqətsizlik faciəvi qəzaya səbəb olur.

Hər bir hərəkət iştirakçısına təhlükəsiz yol arzu edirik!".

Azad olunan ərazilərimizdə bərpa-quruculuq işlərinə şahidlik etmək zövq verir - Polad Bülbüloğlu

Azad olunan ərazilərimizdə bərpa-quruculuq işlərinə şahidlik etmək zövq verir - Polad Bülbüloğlu

Azad olunan ərazilərimizdə aparılan bərpa-quruculuq işlərinə şahidlik etmək zövqvericidir.

YAZTV-nin  məlumatına görə, bu sözləri jurnalistlərə açıqlamasında Xalq artisti, Azərbaycanın Rusiyadakı səfiri Polad Bülbüloğlu deyib.

O qeyd edib ki, azad olunan ərazilərdə bərpa-quruculuq işləri çox sürətlə gedir:

"Hətta Moskvada mənə sual verilir ki, necə ola bilər ki, Füzuli Beynəlxalq Aeroportu cəmi 8 aya tikilib? Bu doğrudan da bir möcüzədir.

Gözümün qarşısında dağların ətəyindən yol salındı. Biri var bütün bunları haradasa oxuyasan, görəsən, biri də var öz gözlərinlə canlı şahidi olasan. Həqiqətən bütün bunlar insana zövq verir. Ona görə ki, ölkəmiz, xalqımız, Prezidentimiz çox uğurlu işlər görür. Xoşbəxt insanam ki, bunların hamısını gördüm”,- P.Bülbüloğlu deyib/

Ezamiyyə xərclərinin normalarına dəyişiklik edilib

Ezamiyyə xərclərinin normalarına dəyişiklik edilib

Nazirlər Kabineti “Ezamiyyə xərclərinin normaları haqqında” qərarında dəyişiklik edib.

YAZTV xəbər verir ki, Baş nazir Əli Əsədov bununla bağlı qərar imzalayıb.

Dəyişikliyə əsasən, mühafizə olunan şəxslərin ölkədaxili səfərləri zamanı təhlükəsizliyi təmin edən Azərbaycan Respublikası Prezidentinin Təhlükəsizlik Xidməti əməkdaşlarının mehmanxana xərcləri təqdim edilmiş təsdiqedici sənədlərə əsasən faktiki xərclərə uyğun olaraq ödəniləcək.