Monday, 29 Noyabr 2021 04:11
Yeni Azərbaycan Televiziyası
Bakı
İstanbul
Moskva
Bu gün Xalq şairi Fikrət Qocanın doğum günüdür

Bu gün Xalq şairi Fikrət Qocanın doğum günüdür

Fikrət Qoca yaradıcılığında milli ədəbi-bədii ənənələrdən bəhrələnərək çağdaş problemləri, qayğıları, müasir dövrü, zamanın bədii lirikasını canlandırıb. Şair həmçinin tarixə, keçmişə, milli-mənəvi dəyərlərə, qan yaddaşının oxunmamış səhifələrinə nəzər yetirib, vətənpərvərlik və milli ruhda şeirlər, hekayələr qələmə alıb. Onun poeziyasında müqəddəs vətən torpağına sonsuz məhəbbət, onun gələcəyinə olan nigarançılıq, vətən şəhidlərinin əziz xatirəsinə böyük ehtiram, yurdumuzun əsrarəngiz təbiət gözəllikləri, tarixi şəxsiyyətləri barədə düşüncələr əsasdır, aparıcıdır. Fikrət Qocanın əsərləri oxucunu vətən və millət haqqında düşünməyə vadar edir. Şairin vətənə həsr olunan şeirlərində bütövlükdə Azərbaycanın təkrarsız gözəllikləri, yurdumuzun igid, qəhrəman övladları, tariximizin şərəfli səhifələri poetik bir dillə vəsf olunub.

YAZTV xəbər verir ki, bu gün Xalq şairi Fikrət Qocanın anadan olmasının 86-cı ildönümü tamam olur.

Fikrət Qoca 1935-ci il avqustun 25- də Ağdaş rayonunun Kotanarx kəndində anadan olub. Şair ədəbi yaradıcılığa kiçik yaşlarından meyil göstərib. O, 1964-cü ildə Moskvada Maksim Qorki adına Ədəbiyyat İnstitutunu bitirib.

Əsərləri 1956-cı ildən mətbuatda çap edilir. Azərbaycan Radio və Televiziya Verilişləri Komitəsində, "Azərbaycan gəncləri" qəzetində, "Azərbaycan" jurnalında fəaliyyət göstərib, Azərbaycan Yazıçılar Birliyində beynəlxalq əlaqələr üzrə məsul katib olub.

Çap etdirdiyi şeir kitablarında vətən məhəbbəti, vətənpərvərlik duyğuları, insan və zaman haqqında düşüncələri öz əksini tapıb. Dünyanın bir çox ölkəsində yaradıcılıq səfərlərində olub, həmin ölkələrdə gedən milli azadlıq hərəkatlarına şeirlər həsr edib, o cümlədən, Kubanın azadlıq mübarizi Ernesto Çe Gevara ("Ünvansız məktublar"), Qvineya-Bisaunun azadlıq hərəkatı xadimi Amilkar Kabral ("Amilkar Kabral"), Filippinin milli qəhrəmanı Xose Risal ("Xose Risal"), vyetnamlı gənc Li Vi Tom ("Li Vi Tom") və b. haqqında poemalar yazıb. 1990-cı illərdə yazdığı "Oddan keçənlər", "İnsan səviyyəsi", "Adi həqiqətlər" və s. poemalarında Azərbaycanda gedən azadlıq mübarizəsindən bəhs olunur. Onun bir sıra nəsr əsərləri də var. "Ölüm ayrılıq deyil" (1990), "Hələlik,-qiyamətədək" (2000) povestlərində 1990-cı ilin 20 Yanvar hadisələri öz əksini tapıb.

Mixail Lermontov, Taras Şevçenko, Eduard Mejelaytis, İ.Volker, X.Risal, İ.Taufer və başqalarından tərcümələri var. Əsərləri bir sıra xarici dillərə tərcümə olunub.

Şeirlərinə musiqilər bəstələnib ("Anacan, dostum evlənir", "Könlüm", "Günay", "Gəl ey səhər", "Çiçək tapa bilmədim", "Gecə yaman uzundur", "Payız gəldi" və s.). Onun mətni əsasında yazılan musiqi əsərləri tanınmış müğənnilərin repertuarına daxil edilib.

Gənclərin qəhrəmanlıq və fədakarlığından bəhs edən "Təkərlər geri fırlanır", "Yaralı çiçəklər" və "Rəssam düşünür" poemalarına görə 1968-cı ildə Azərbaycan Komsomolu mükafatına, 90-cı illər yaradıcılığına görə "Humay" mükafatına (1998) layiq görülüb. Fikrət Qocanın uzunmüddətli səmərəli yaradıcılıq fəaliyyəti yüksək qiymətləndirilib. O, “Əməkdar incəsənət xadimi” və “Xalq şairi” fəxri adlarını alıb, Azərbaycan Respublikasının ali dövlət təltiflərindən olan “Şöhrət”, “Şərəf” və “İstiqlal” ordenlərinə, Dövlət mükafatına və “Azərbaycan Respublikası Prezidentinin fəxri diplomu”na layiq görülüb.

Bu günə qədər şairin "Qağayı", "Hamıya borcluyam", "Stixi", "Dənizdə ay çiməndə", "Od gəlini", "Yatmadığım gecələrdə", "Günlərin bir günü", "Gül ömrü", "İnsan xasiyyəti", "Ömürdən səhifələr", "Mavi dünyanın adamları", "Taleyin ağır taleyi", "Seçilmiş əsərləri", "Eldən elə - dildən dilə", "Sükutun səsi" və s. kitabları oxucuların ixtiyarına verilib.

Yaradıcılığının əsasında dayanan yeni fikir, yeni ahəng uğrunda apardığı mübarizə diqqəti cəlb edir. Bu, o deməkdir ki, onun yaradıcılığında ənənə və novatorluq ayrıca çalarlar ilə üzə çıxır. Fikrət Qoca şeirləri heca vəznində yaratsa da, onun sərbəst düşüncələrində qafiyə axtarışı kənarda qalır. Bu keyfiyyətlər yaradıcılığında təbii və səmimi şəkildə üzə çıxdığı üçün diqqətəlayiqdir.

Xalq şairi Fikrət Qoca 2021-ci il mayın 5-də, 85 yaşında vəfat edib və Fəxri xiyabanda dəfn olunub.

Mir Cəlal yaradıcılığı İspaniya ədəbiyyat portalında

Mir Cəlal yaradıcılığı İspaniya ədəbiyyat portalında

İspaniyanın populyar “Trabalibros” ədəbiyyat portalı görkəmli Azərbaycan yazıçısı Mir Cəlalın ispan dilinə tərcümə edilmiş “İki ananın bir oğlu” hekayəsinə və ədibin yaradıcılığı haqqında məlumata səhifə ayırıb.

Bu barədə YAZTV-yə Azərbaycan Dövlət Tərcümə Mərkəzindən bildirilib.

Əsərin ispan dilinə tərcümə müəllifi Rəhimə Məmmədovadır.

Qeyd edək ki, geniş oxucu kütləsi tərəfindən izlənən “Trabalibros” müntəzəm olaraq səhifələrində Xuan Rulfo, Tomas Mann, Vladimir Nabokov, Volfqanq Höte, Migel Delibes, Federiko Qarsiya Lorka kimi dünya şöhrətli yazıçı və şairlərin yaradıcılığını işıqlandırır. (AZƏRTAC)

Kino Günü ilə bağlı mükafatı onlar qazandı

Kino Günü ilə bağlı mükafatı onlar qazandı

Azərbaycan Kinematoqrafçılar İttifaqı Kino Günü ənənəvi mükafatının qaliblərini elan edib.

YAZTV” xəbər verir ki, İttifaqın katibliyinin qərarına əsasən, 2021-ci il üçün İttifaqın ənənəvi mükafatına aşağıdakı kinematoqrafçılar təltif olunublar:

Rejissor Emil Quliyev – “Pərdə” trilogiyasında sosial-mənəvi problemlərin uğurlu kino həllinə görə.

 

Ssenarist Nəriman Əbdülrəhmanlı – Azərbaycan kino səlnaməsinin yaradılmasında xidmətlərinə görə.

Rejissor Hilal Baydarov  “Səpələnmiş ölümlər arasında” filmində obrazların  poetik vizual həllində uğurlarına görə.

Qeyd edək ki,  mükafatı təsis etməkdə məqsəd milli kinoda müsbət tendensiyaları diqqət mərkəzinə gətirməkdir. Nominantların seçimini apararkən İttifaqın katibliyi ötən kino mövsümü ərzində gedən prosesi diqqətlə müşahidə və təhlil edir, kinematoqrafiyanın müxtəlif sahələrindəki xidmətləri qeyd edir və açıq səsvermə yolu ilə laureatları seçir.

Kinoteatr və tetrlarla bağlı Operativ Qərargahdan açıqlama

Kinoteatr və tetrlarla bağlı Operativ Qərargahdan açıqlama

Kinoteatr və tetrlarların fəaliyyətinin bərpa olunması ilə bağlı gələcəkdə epidemioloji vəziyyət nəzərə alınmaqla qərar verilə bilər.

YAZTV-nin məlumatına görə, bunu Prezidentin köməkçisi, Prezident Adminstrasiyasının İqtisadi məsələlər və innovativ inkişaf şöbəsinin müdiri Şahmar Mövsümov Operativ Qərargahın bu gün keçirilən brifinqində deyib.

Onun sözlərinə görə, bu sahələrdə uzun müddətdir ki, bağlı qalan sahələrdəndir. Əgər epidemioloji vəziyyət sabitləşərsə, bu sahələrində müəyyən qaydalar çərçivəsində bərpası müzakirə oluna bilər.

“Avrasiya Tiyatrolar Birliyi”nin I qurultayı öz işini başa vurub

“Avrasiya Tiyatrolar Birliyi”nin I qurultayı öz işini başa vurub

Türkiyə Cümhuriyyətinin İstanbul şəhərində keçirilən “Avrasiya Tiyatrolar Birliyi”nin I qurultayıyekunlaşıb. Bu barədə YAZTV-yə məlumatı Gəncə Dövlət Dram Teatrının Ədəbi-hissə müdiri, teatrşünas-tənqidçi Anar Burcəliyev bildirib. 

Onun sözlərinə görə, İstanbulda  21 ölkənin iştirakı ilə keçirilən toplantı üç gün davam edib. “Avrasiya Tiyatrolar Birliyi”nin I qurultayında Azərbaycan təmsilçisi olaraq Gəncə Dövlət Dram Teatrının aktyoru Yusif Cəfərov iştirak edib.  O, bu toplantıya Mədəniyyət Nazirliyinin dəstəyi ilə göndərilib. Tanışlıq məqsədilə baş tutan ilk qurultay sonda 12 maddədən ibarət qərarın qəbul edilməsi ilə yekunlaşıb.

Teatrşünas-tənqidçi Anar Burcəliyev həmçinin bildirib ki, qurultayda müazkirə edilən məsələlər əsasən ölkə nümayəndələri ilə tanışlıq məqsədi daşımaqla, teatr ənənələrinin inkişaf  mexanizmi  ətrafında geniş fikir mübadiləsi etmək və qarşılıqlı əlaqələrin qurulması mexanizmlərinin öyrənilməsilə yanaşı aktyor, rejissor  mübadiləsi, fərqli ölkələrdə aktyor, rəssam master  klaslarının təşkil olunmasını planlaşdırır.

Qeyd edək ki, növbəti toplantının Portuqaliya və İspaniyada keçiriləcək.
 

Gəncədə Qəmbər Hüseynlinin anım mərasimi keçirilib

Gəncədə Qəmbər Hüseynlinin anım mərasimi keçirilib

Gəncədə Azərbaycan Respublikasının Əməkdar incəsənət xadimi, görkəmli bəstəkar Qəmbər Hüseynlinin anım mərasimi keçirilib.
 
Tədbirdə Gəncə Şəhər İcra Hakimiyyətinin başçısı Niyazi Bayramov, Gəncə Regional Mədəniyyət İdarəsinin rəisi Vasif Cənnətov, bəstəkarın ailə üzvləri və şəhər rəsmiləri iştirak ediblər. 

Əvvəlcə tədbir iştirakçıları dünya şöhrətli bəstəkarın məzarı üzərinə tər çiçəklər düzüblər. 

Niyazi Bayramov çıxış edərək Gəncənin milli mədəniyyət, elm, incəsənət mərkəzi olduğunu deyib və dahi bəstəkarın incəsənət sahəsində əldə etdiyi nailiyyətlərdən danışıb. Şəhər rəhbəri Qəmbər Hüseynlinin məzarının yerləşdiyi ərazinin yaxın gələcəkdə əsaslı şəkildə təmir olunacağını tədbir iştirakiçılarının diqqətinə çatdırıb.

Bəstəkarın ailə üzvləri, Qəmbər Hüseynlinin yaradıcılığına göstərdikləri xüsusi diqqətə görə ölkə başçısı İlham Əliyevə, birinci vitse-prezident Mehriban Əliyevaya və şəhər rəhbərliyinə təşəkkürlərini bildiriblər. Daha sonra onlar “Cücələrim” mahnısı ilə bütün dünyaya səs salan Qəmbər Hüseynli haqqında xatirələrini bölüşüblər. Onun həyat və yaradıcılığından danışıblar. 

Tədbirin bədii hisəsində Gəncə Dövlət Filarmoniyasının Xalq Çalğı Alətləri ansamblının müşayiəti ilə Respublikanın Əməkdar artisi Kəmalə Tağızadə, Əməkdar mədəniyyət işçisi Mehparə Cəfərova bəstəkarın sevilən “Ay işığında” və “İlk məhəbbətim” əsərlərini səsləndiriblər. 

Qeyd edək ki, Qəmbər Hüseynli 16 aprel 1916-cı ildə Gəncədə dəmirçi Məşədi Muxtarın ailəsində anadan olub. Bəstəkarın "Cücələrim" mahnısı dünyanın 148 xalqının dilinə tərcümə olunub. Sənətşünasların, sənət bilicilərinin yekdil rəyinə görə, indiyə qədər "Cücələrim" kimi öz müəllifini bütün dünyada tanıtdıran ikinci mahnı olmayıb. Qəmbər Hüseynli 1961-ci il iyulun 31-də  dünyasını dəyişib.

Bu gün Müslüm Maqomayevin doğum günüdür

Bu gün Müslüm Maqomayevin doğum günüdür

Hər il avqustun 17-də zəmanəmizin görkəmli müğənnisi, SSRİ-nin və Azərbaycanın Xalq artisti Müslüm Maqomayevin xatirəsi anılır.

YAZTV xəbər verir ki, bu gün Xalq artisti Müslüm Maqomayevin anadan olmasının 79-cu ildönümü tamam olur.

On dörd yaşında doğma şəhəri Bakıda dənizçilər klubunda çıxış edən Müslüm Maqomayev ilk uğurunu 1962-ci ildə qazanıb. Maestro Niyazinin tövsiyəsi ilə tələbə və gənclərin Helsinkidə keçirilən VIII Ümumdünya Festivalına yollanan Müslüm oradan medalla qayıdıb. Bu münasibətlə populyar "Oqonyok" jurnalı onun portretini və "Bakılı gənc dünyanı fəth edir" sərlövhəli məqalə dərc edib.

Müslüm Maqomayev XX əsrin 60-cı illərində Azərbaycan Dövlət Akademik Opera və Balet Teatrının solisti olub, Milanın dünya şöhrətli "La Skala" teatrında təcrübə keçib.

Ötən əsrin 60-70-ci illərində Müslüm Maqomayevin məşhurluğunun həddi-hüdudu yox idi. Konsert salonlarındakı yerlər azlıq etdiyindən o, stadionlarda minlərlə dinləyici qarşısında çıxış edir, daim qastrol səfərlərində olurdu. Mahnıları yazılan vallar çox böyük tirajla buraxılırdı. Məhz buna görə də onu sovet estradasının son yarım əsrdəki ən parlaq ulduzu, kralı, rəmzi adlandırırlar. Keçmiş SSRİ-də klassik opera ariyalarını estradaya məhz Müslüm Maqomayev gətirib. Təsadüfi deyil ki, o, 31 yaşında SSRİ xalq artisti fəxri adına layiq görülüb.

Dünya şöhrətli müğənninin repertuarında 600-dək əsər var. O həm də gözəl mahnılar müəllifidir. Müslum Maqomayevin ecazkar səslə ifa etdiyi mahnıların sırasında dahi Üzeyir Hacıbəylinin Nizami Gəncəvinin qəzəllərinə bəstələdiyi "Sənsiz" və "Sevgili canan" romanslarının xüsusi yeri var. Ona görə ki, burada üç dahi sənətkarımızın - şair, bəstəkar və müğənninin ruhu görüşür. Onu da etiraf etmək yerinə düşər ki, bu romanslar Müslümə qədər korifey sənətkarların ifasında səslənib. Amma o, bu romanslara elə çalarlar, elə bənzərsiz intonasiyalar gətirdi, elə sevgi ilə yanaşdı ki, onları fərqləndirməyi, özününküləşdirməyi bacardı, fəlsəfi yüksəkliyə qaldırdı.

Onun xalq şairi Nəbi Xəzrinin sözlərinə bəstələdiyi və dillər əzbəri olan, vətənimizin himni kimi əzəmətli səslənən "Azərbaycan" mahnısı da ölkəmizə ithaf olunmuş ən gözəl əsərlərdəndir. Müğənni həm də "Oxuyur Müslüm Maqomayev", "Nizami", "Moskva notlarda" filmlərində çəkilib.

Müslüm Maqomayev çoxşaxəli sənətkar idi. Belə geniş diapazonu, ürəkləri fəth edən həm lirik, həm də güclü səsə çox az rast gəlinir. Müslüm Maqomayev ifa etdiyi hər mahnıda, ariyada yeni bir dünya, öz dünyasını yaradırdı.

Azərbaycan xalqının zəngin musiqi ənənələrinin qorunub saxlanılmasında və müasir dövrdə layiqincə inkişaf etdirilməsində Müslüm Maqomayevin yaratdığı və rəhbərlik etdiyi Azərbaycan Dövlət estrada-simfonik orkestri mühüm rol oynayıb. Orkestrin rəngarəng proqramlarında M.Maqomayev əsil sənətkara xas əzmkarlıqla hər bir ifasını bir aktyorun teatrı səviyyəsinə qaldırmağa nail olub.

M.Maqomayevin milli musiqi mədəniyyətimizin inkişafı sahəsində mühüm nailiyyətləri yüksək qiymətləndirilib və o, müstəqil Azərbaycanın ali mükafatları – "Şöhrət" və "İstiqlal" ordenləri ilə təltif edilib. Ecazkar səsi ilə dünyanı fəth edən Müslüm Maqomayevin 70 illik yubileyi Azərbaycan Respublikasının Prezidenti İlham Əliyevin müvafiq Sərəncamı ilə silsilə tədbirlərlə qeyd olunub.

Onun yoxluğunun acısını daha çox hiss edən sənətkarın ömür-gün yoldaşı, SSRİ xalq artisti, məşhur opera müğənnisi Tamara Sinyavskaya deyir: "Müslüm Maqomayevi yığcam, qısa fikirlərlə təsvir etmək çətindir. O, böyük insan idi. Həyatımın müxtəlif illəri onunla birgə keçmişdir. Fikirlərini mənimlə bölüşərdi. O anlar mənim üçün unudulmaz olduğu qədər də əlçatmazdır. Müslüm Maqomayev ad gününü böyük salonlarda, hay-küylü keçirməyi xoşlamazdı, ancaq dostlarının əhatəsində qeyd edərdi. Hədiyyələri bir o qədər də sevməzdi. Ad günündə onun haqqında gözəl sözlər deyərdilər. Mən bunların şahidi olmuşam. Müslüm Maqomayev bütün dövrlərin musiqiçisidir və ikinci belə bir sənətkar dünyaya gəlməyəcəkdir".

Dünyaya göz açdığı 17 avqustu Azərbaycan təqvimində əlamətdar günə çevirən ölməz Müslüm Maqomayev qəlblərdə elə bir sənət abidəsi ucaldıb ki, onu sevənlərin sayı heç zaman azalmayacaq.

Gəncə Dövlət Dram Teatrının aktyoru Yusif Cəfərov Türkiyədə ölkəmizi təmsil edir

Gəncə Dövlət Dram Teatrının aktyoru Yusif Cəfərov Türkiyədə ölkəmizi təmsil edir

Türkiyə Cümhuriyyətinin İstanbul şəhərində “Avrasiya Tiyatrolar Birliyi”nin I qurultayı öz işinə başlayıb. Bu barədə YAZTV-yə Gəncə Dövlət Dram Teatrının Ədəbi-hissə müdiri, teatrşünas-tənqidçi Anar Burcəliyev bildirib. Onun sözlərinə görə 21 ölkənin iştirakı ilə keçirilən “Avrasiya Tiyatrolar Birliyi”nin I qurultayında Azərbaycan təmsilçisi olaraq Gəncə Dövlət Dram Teatrının aktyoru Yusif Cəfərov da var.

Teatrşünas-tənqidçi Anar Burcəliyev həmçinin bildirib ki; “Gəncə Dövlət Dram Teatrının aktyoru Yusif Cəfərov toplantıda Azərbaycan Respublikasını təmsil edir. 21 ölkənin iştirakı ilə keçirilən bu toplantıya aktyor Yusif Cəfərov Azərbaycan Respublikası Mədəniyyət Nazirliyinin dəstəyi ilə göndərilib. İlk qurultay ölkə nümayəndələri ilə tanışlıq məqsədi daşımaqla yanaşı teatr ənənələrinin inkişaf mexanizmi ətrafında geniş fikir mübadiləsi etmək və qarşılıqlı əlaqələrin qurulmasından ibarətdir” – deyə Anar Burcəliyev bildirib.

Flora Kərimovaya “Şərəf” ordeni və Prezidentin fərdi təqaüdü verilib - SƏRƏNCAM

Flora Kərimovaya “Şərəf” ordeni və Prezidentin fərdi təqaüdü verilib - SƏRƏNCAM

Prezident İlham Əliyev F.Ə.Kərimovanın “Şərəf” ordeni ilə təltif edilməsi haqqında sərəncam imzalayıb.

YAZTV xəbər verir ki, Azərbaycan musiqi sənətinin inkişafında xidmətlərinə görə Flora Ələkbər qızı Kərimova “Şərəf” ordeni ilə təltif edilib.

Prezident İlham Əliyevin imzaladığı digər sərəncamla Azərbaycan musiqi sənətinin inkişafında uzunmüddətli səmərəli fəaliyyətinə görə Flora Ələkbər qızı Kərimovaya Azərbaycan Respublikası Prezidentinin fərdi təqaüdü verilib.

Nizami Gəncəvi yaradıcılığı haqqında beynəlxalq konfransa məqalə qəbulu davam edir

Nizami Gəncəvi yaradıcılığı haqqında beynəlxalq konfransa məqalə qəbulu davam edir

Xəzər Universiteti dekabrın 9-10-da dahi şair və mütəfəkkir Nizami Gəncəvi ilə bağlı beynəlxalq konfrans keçirəcək.

Universitetdən  bildirilib ki, arzu edən tədqiqatçılar “Nizami Gəncəvinin əsərlərinin digər dillərdə tərcümələri”, “Nizami yaradıcılığında dünya sivilizasiyaları”, “Nizami Gəncəvinin ədəbi irsində dünyanın tarixi və coğrafi kosmologiyası” mövzularında tezislərini təqdim edə bilərlər. Eyni zamanda, Nizami yaradıcılığına dair hər hansı mövzuda yazılan məqalələr təqdim oluna bilər.

Məqalələrin qəbulu noyabrın 15-dək davam edəcək. (AZƏRTAC)

Amaliya Pənahovanın xatirə barelyefinin açılışı olub

Amaliya Pənahovanın xatirə barelyefinin açılışı olub

Bu gün görkəmli teatr və kino xadimi, Xalq artisti, Dövlət mükafatı laureatı Amaliya Pənahovanın (1945-2018) Bakı şəhərində yaşadığı binanın (Fikrət Əmirov küçəsi 1) fasadında barelyefinin açılış mərasimi keçirilib.

"YAZTV" xəbər verir ki, mərasimdə mədəniyyət naziri Anar Kərimov, Yazıçılar Birliyinin sədri Anar, Teatr Xadimləri İttifaqı İdarə Heyətinin sədri Azər Paşa Nemətov, xalq artistləri Həmidə Ömərova, Hacı İsmayılov, Nurəddin Mehdixanlı, Rasim Balayev və aktrisanın digər həmkarları iştirak ediblər.

Sonra müəllifi heykəltəraş, Xalq rəssamı Natiq Əliyev olan barelyefin açılışını bildirən qırmızı lent kəsilib.

Qeyd edək ki, Xalq artisti Amaliya Pənahovanın barelyefi Nazirlər Kabinetinin 21 iyun 2019-cu il tarixli sərəncamına əsasən hazırlanıb. Sərəncamda sənətkarın yaşadığı binaya onun xatirə lövhəsinin vurulması Mədəniyyət Nazirliyi və Bakı Şəhər İcra Hakimiyyətinə tapşırılmışdı.

 

 

Gəncədə “Nizami və vətənpərvərlik” mövzusunda tədbir keçirilib

Gəncədə “Nizami və vətənpərvərlik” mövzusunda tədbir keçirilib

Gəncə Regional Mədəniyyət İdarəsinin və Gəncə Dövlət Tarix-Mədəniyyət Qoruğunun Nizami Gəncəvi Məqbərə filialının birgə təşkilatçılığı ilə  “Nizami və vətənpərvərlik” mövzusunda tədbir keçirilib. Tədbir Nizami Gəncəvi Muzeyinin qarşısında gerçəkləşib.

Əvvəlcə Nizami Gəncəvi Məqbərəsi ziyarət olunub,  məzarı üzərinə təzə-tər qərənfillər düzülüb. Sonra Nizami Gəncəvi Muzeyinə ekskursiya təşkil edilib.

Tədbirdə II Qarabağ Vətən müharibəsində şəhidlik zirvəsinə ucalan Azərbaycan övladlarının əziz xatirəsinə ehtiram yad olunub.

Mərasimdə Gəncə Regional Mədəniyyət İdarəsinin rəisi Vasif Cənnətov, Gəncə şəhər Gənclər və İdman Baş İdarəsinin rəisi Həmid Nəsirov, Gəncə şəhər “Maarif evi” İctimai Birliyinin sədri İmamverdi Vəliyev, Gəncə şəhər “Gənclər evinin” direktoru Amil Qurbanov, Gədəbəy rayon Təhsil İdarəsinin aparıcı məsləhətçisi Şahzadə Qəhrəmanlı və digərləri iştirak edib.

Vasif Cənnətov tədbir iştirakçılarını salamlayaraq, ölkə rəhbəri  İlham Əliyevin 05 yanvar 2021-ci il tarixli Sərəncamı ilə bu ilin “Nizami Gəncəvi ili” elan olunmasından, Sərəncamın icrası ilə bağlı Azərbaycan Respublikasının Mədəniyyət Nazirliyinin müvafiq əmrindən və Gəncə Regional Mədəniyyət İdarəsinin Tədbirlər planından danışıb. O bildirib ki, regional idarənin təşəbbüsü və təşkilatçılığı ilə Nizami Gəncəvi ili çərçivəsində bir çox silsilə tədbirlər canlı və ya onlayn şəkildə keçirilib. Eyni zamanda, Regional İdarənin tabeliyində fəaliyyət göstərən Gəncə, Naftalan şəhər, Goranboy, Samux, Kəlbəcər və Xocalı rayonlarındakı mədəniyyət müəssisələrində də silsilə tədbirlərin davam etdiyini diqqətə çatdırıb. 
 
Milli Elmlər Akademiyasının Nizamişünaslıq şöbəsinin aparıcı elmi işçisi, filologiya üzrə elmlər doktoru, dosent Təhminə Bədəlova “Nizami yaradıcılığında vətənpərvərlik”  mövzusunda ətraflı çıxış edib. 

Daha sonra F.Əmirov adına Gəncə Dövlət Filarmoniyasının “Muğam” üçlüyünün ifasında (Gəncə şəhər 1 nömrəli Uşaq Musiqi Məktəbinin səs-muğam sinfinin müəllimi, Filarmoniyanın solisti Xəyal Əliyev, tar ifaçısı Çoşğun Süleymanov, kamança ifaçısı Ayxan Məmişov) məşhur “Xudayar təsnifi” təqdim olunub. Həmçinin, məktəblilərin bir--birindən rəngarəng çıxışları tədbir iştirakılarına xoş anlar bəxş edib.  Gədəbəy şəhər 1 nömrəli tam orta məktəbin XI sinif şagirdi Nərmin İbrahimlinin sulu boya ilə çəkdiyi Nizami Gəncəvinin portreti isə böyük maraqla qarşılanıb.

“Nizami və vətənpərvərlik” mövzusunda keçirilən tədbir Gəncə Dövlət Filarmoniyasının Muğam üçlüyünün Nizami Gəncəviyə həsr etdiyi musiqi nömrəsi ilə başa çatıb.

Sonda xatirə şəkli çəkdirilib.