Monday, 29 May 2023 06:51
Yeni Azərbaycan Televiziyası
Bakı
İstanbul
Moskva
MOK yazı müsabiqəsi elan etdi

MOK yazı müsabiqəsi elan etdi

Milli Olimpiya Komitəsi (MOK) 22 iyul – Milli Mətbuat Günü münasibətilə “Olimpiya Oyunları – Uğur Hekayələri” mövzusunda yazı müsabiqəsi elan edib.

MOK-un mətbuat xidmətindən YAZTV-ə verilən məlumata görə, müsabiqəyə olimpiadaya qatılan idmançıların həyat yolundan, uğur hekayələrindən bəhs edən araşdırma yazılar təqdim olunmalıdır.

Qaydalara əsasən, hər jurnalist bir yazı təqdim etmək hüququna malikdir. Yazı MOK-un elan etdiyi istiqamətlərə uyğun olmalıdır. Müəlliflər elan edilmiş istiqamətə uyğun olaraq yazıların mövzu və sərlövhələrini sərbəst şəkildə müəyyənləşdirə bilərlər.

Yazılar iyulun 10-dək qəbul ediləcək. Qaliblərə müvafiq olaraq 500 manat, 300 manat və 200 manat mükafat veriləcək.

“Neftçi” klubu qapıçı Kamran İbrahimov ilə yeni müqavilə imzalayıb

“Neftçi” klubu qapıçı Kamran İbrahimov ilə yeni müqavilə imzalayıb

“Neftçi” klubu daha bir futbolçu ilə müqavilənin müddətini uzadıb.

YAZTV klubun saytına istinadla xəbər verir ki, qapıçı Kamran İbrahimovun daha iki il paytaxt təmsilçisinin heyətində qalmasına dair müqavilə imzalanıb. İyirmi yaşlı qolkiper 2022-ci il mayın sonunadək “ağ-qaralar”ın formasını geyinəcək.

Flaqman daha əvvəl Anton Krivotsyuk, Emin Mahmudov və Ömər Buludov ilə də yeni müqavilələr imzalayıb.

Azərbaycan Premyer Liqasının bərpa tarixi açıqlandı - RƏSMİ

Azərbaycan Premyer Liqasının bərpa tarixi açıqlandı - RƏSMİ

Bu gün AFFA-nın təşəbbüsü ilə Klublar Komitəsinin videokonfrans formatında ikinci iclası keçirilib.

YAZTV-nin  milli assosiasiyanın rəsmi saytına istinadən verdiyi məlumata görə, AFFA-nın icraçı vitse-prezidenti Elxan Məmmədov, Peşəkar Futbol Liqasının (PFL) prezidenti Ramin Musayev, Premyer Liqa klublarının rəhbər şəxsləri və AFFA-nın baş həkimi Vyaçeslav Xomenko iclasda iştirak edib.

E.Məmmədov iclası açaraq ölkəmizdə koronavirus (COVID-19) infeksiyasının qarşısının alınması, pandemiya dövründə vətəndaşların sağlamlığı naminə dövlət tərəfindən həyata keçirilən məqsədyönlü tədbirlərlə əlaqədar futbol ictimaiyyəti adından Prezident İlham Əliyevə minnətdarlığını bildirib.

İclasın gündəliyinə aşağıdakı məsələlər daxil edilib:

1. 2020-ci il iyunun 1-dən Premyer Liqa klublarının məşqlərinin, habelə 2020-ci il iyunun 21-də Premyer Liqa və Azərbaycan Kuboku oyunlarının bərpası

2. Premyer Liqa klublarının futbolçu və məşqçi heyətinin həftəlik olaraq COVID-19 testinə cəlb olunması

3. Premyer Liqa və Kubok oyunlarının bərpası ilə bağlı oyun təqviminin müzakirəsi

4. Oyunlar bərpa olunduqdan sonra hər hansı futbolçu və ya məşqçinin COVID-19 testi müsbət nəticələnəcəyi təqdirdə, atılacaq növbəti addımlar

5. COVID-19 pandemiyası ilə bağlı klub və futbolçular arasında imzalanmış mövcud müqavilələrə müvafiq bəndlərin əlavə olunmasının müzakirəsi

6. Digər məsələlər

E.Məmmədov gündəlikdəki məsələlər barədə danışaraq qeyd edib ki, müzakirəyə çıxarılan mövzular əvvəlcədən klublara göndərilib. Sonra R.Musayev fikirlərini bildirib. Premyer Liqa klublarının rəsmiləri gündəlikdəki bütün məsələlər barədə çıxış etdikdən sonra V.Xomenko mövcud vəziyyətdə sanitar-gigiyenik qaydalara riayət olunmasının və COVİD-19 testinin vacibliyi barədə danışıb.

Ətraflı müzakirələrdən sonra aşağıda qeyd olunanlarla bağlı razılıq əldə olunub:

1. 2020-ci il iyunun 1-dən Premyer Liqa klublarının məşqləri, iyunun 21-də Premyer Liqa və Azərbaycan Kuboku oyunları bərpa olunsun;

2. Premyer Liqa oyunlarının bərpasından əvvəl klublarının futbolçu və məşqçi heyəti mütləq şəkildə COVID-19 testinə cəlb olunsun. Sonrakı dövrlərdə testin təkrar keçirilib-keçirilməməsi barədə qərarı hər bir klub fərdi qaydada qəbul edə bilər;

3. Premyer Liqa və Kubok oyunlarının təqvimi PFL tərəfindən hazırlanaraq yaxın günlərdə klublara göndəriləcək;

4. Oyunlar bərpa olunduqdan sonra hər hansı futbolçu və ya məşqçinin “COVID-19” testi müsbət nəticələnəcəyi təqdirdə, AFFA müvafiq dövlət strukturları ilə danışıqlardan sonra müvafiq təlimatlara uyğun hərəkət edəcək;

5. COVID-19 pandemiyası ilə bağlı klub və futbolçular arasında imzalanmış mövcud müqavilələrə müvafiq bəndlərin əlavə olunması PFL və klublar arasında müzakirə olunacaq.

Qeyd olunanlarla yanaşı, iclasda məşqlərin və oyunların təşkili zamanı texniki proseslər ətraflı müzakirə olunub, Nazirlər Kabineti yanında Operativ Qərargahın qərar və tövsiyələrinə riayət olunmasının vacibliyi xüsusi vurğulanıb.

Klublar Komitəsinin iclasında müzakirə olunan bir sıra məsələlər yekun qərarların qəbul olunması üçün İcraiyyə Komitəsinin növbəti iclasının gündəliyinə daxil olunacaq.

Virtual Azərbaycan Qran-prisini 22 milyondan çox insan izləyəcək

Virtual Azərbaycan Qran-prisini 22 milyondan çox insan izləyəcək

"Formula 1" üzrə virtual dünya çempionatında Azərbaycan Qran-prisi iyunun 7-də start götürəcək.

"YAZTV"nin məlumatına görə, yarışda ümumilikdə 16 kiberidmançı iştirak edəcək.

Köhnə pilotların sırasına Serxio Peres, Pyer Qasli, Aleks Albon, Antonio Covinatsi, Nikolas Latifi, Şarl Lekler və Lando Norris də qoşulub. İlk iki kiberidmançının virtual dünya çempionatında debütü məhz Bakıdakı yarışa təsadüf edəcək.

Qran-pridə İngiltərənin "Mançester Siti" klubunun müdafiəçisi Aymerik Laporte, İtaliya "Milan"ının qapıçısı Canluici Donnarumma, Belçika millisi və İspaniya "Real Madrid"inin qolkiperi Tibo Kurtua kimi futbol ulduzları da qüvvələrini sınayacaq.

Bakı vaxtı ilə saat 17:00-da start götürəcək virtual yarış "YouTube", "Twitch", "Facebook", həmçinin tərəfdaş telekanallar vasitəsilə yayımlanacaq. Azərbaycan Qran-prisini ümumilikdə 22 milyondan çox "Formula 1" azarkeşi canlı izləyəcək. Əsas Qran-pridən 2 saat əvvəl isə "Formula 2" və "Formula 3" yarışları keçiriləcək.

BOS futbol meydanlarının fəaliyyətini bərpa edir

BOS futbol meydanlarının fəaliyyətini bərpa edir

İyunun 1-dən Bakı Olimpiya Stadionundakı (BOS) açıq futbol-məşq meydanları fəaliyyətini davam etdirəcək.

YAZTV-nin məlumatına görə, bu barədə BOS-un rəsmi "Facebook" səhifəsi məlumat yayıb.

Qeyd edək ki, Nazirlər Kabineti yanında Operativ Qərargah bu gündən açıq məkanlarda idman yarışlarının keçirilməsinə icazə verib.

Ronaldo dünyanın ən çox qazanan futbolçusu seçilib

Ronaldo dünyanın ən çox qazanan futbolçusu seçilib

İtaliyanın “Yuventus” futbol klubunun hücumçusu Kriştiano Ronaldo “Forbes”in son reytinqinə görə, dünyanın ən çox qazanan futbolçusu seçilib.

YAZTV  xəbər verir ki, portuqaliyalı hücumçu 2019-cu il iyunun 1-dən 2020-ci il iyunun 1-dək 105 milyon dollar qazanıb. Bu məbləğin 60 milyonunu maaş və mükafatlar, 45 milyonunu reklam gəlirləri təşkil edib. Ronaldo ən çox qazanan idmançıların reytinqində isə təkcə tennisçi Rocer Federerdən geri qalaraq ikinci olub.

Ən çox qazanan futbolçuların siyahısında Lionel Messi (“Barselona”, 104 milyon) ikinci, Neymar isə (PSJ, 95,5 milyon) üçüncü olub.

UEFA-dan avrokuboklarla bağlı açıqlama

UEFA-dan avrokuboklarla bağlı açıqlama

"Avrokuboklarla bağlı qərar hələ qəbul olunmayıb. Müxtəlif variantlar nəzərdən keçirilir".

"YAZTV"nin məlumatına görə, bununla bağlı UEFA-dan Rusiyanın "Sport-Ekspress" nəşrinin sorğusuna cavab olaraq bildirilib.

Açıqlamada koronavirus pandemiyasına görə dayandırılan Çempionlar Liqası və Avropa Liqası barədə yeniliyin olmadığı qeyd olunub: "Cari mövsümü başa çatdırmağa imkan verən təqvim qərarlarını və format seçimlərini öyrənmək üçün liqaların və klubların nümayəndələrindən ibarət İşçi Qrup yaradılıb. İndiki məqamda müxtəlif variantlar üzərində iş gedir".

Qeyd edək ki, avrokuboklarla bağlı yekun qərarın iyunun 17-də UEFA İcraiyyə Komitəsinin iclasında qəbul olunacağı gözlənilir.

Azərbaycanda ilk dəfə bu idman növündə yarışlar bərpa olunacaq

Azərbaycanda ilk dəfə bu idman növündə yarışlar bərpa olunacaq

Nazirlər Kabineti yanında Operativ Qərargahın müvafiq icazəsindən sonra ilk yarışı Azərbaycan Velosiped İdmanı Federasiyası (AzVİF) keçirəcək.

Bu barədə YAZTV-ə AzVİF-in mətbuat katibi Pərviz Musayev məlumat verib. O bildirib ki, turnir gələn həftəsonu - iyunun 6-da və ya 7-də olacaq.

Musayev yarışın Respublika Velotrekində təşkilinin mümkünlüyünü vurğulayıb: "Bunun trek və ya şose yarışı olacağına sabah aydınlıq gələcək. Yarışı Velotrekdə də, Veloparkda da keçirə bilərik. Amma həftəsonuna yarışın olacağı dəqiqdir. Əsas məqsəd ondan ibarətdir ki, karantin dövründə idmançıların ev şəraitində necə məşq etdiklərini görək. Biz onlara velosiped və digər avadanlıqlar vermişdik ki, ev şəraitində formalarını saxlasınlar. Bir növ idmançıların fiziki durumlarını yoxlamaq niyyətindəyik".

Federasiya rəsmisi hələ yarışın adını müəyyənləşdirmədiklərini əlavə edib: "Bu, Bakı və ya Federasiya Kuboku ola bilər. İyundakı yarışlar çox vacibdir. Çünki iyulun 1-dən beynəlxalq yarışlar bərpa olunur. Qarşıdakı ay ərzində mümkün qədər çox turnir keçirəcəyik ki, beynəlxalq yarışlara hazır olaq".

Mətbuat katibi mövsümün təqvimi ilə bağlı iyunun 1-də məşqçilər korpusu ilə toplantı keçirəcəklərini də diqqətə çatdırıb: "Mövsümün təqvimi alt-üst olub, yenidən işləməliyik".

Qeyd edək ki, Nazirlər Kabineti yanında Operativ Qərargah bu gündən açıq məkanlarda idman yarışlarının keçirilməsinə icazə verib. 2020-ci ilin təqviminə əsasən AzVİF-in ilk daxili yarışı 7-8 martda təşkil etməli idi, lakin koronavirus səbəbindən təxirə salınıb. Həftəsonu keçiriləcək turnir federasiyanın mövsümdə ilk daxili tədbiri olacaq.

İdman zalları nə vaxt açılır? - AÇIQLAMA VERİLDİ

İdman zalları nə vaxt açılır? - AÇIQLAMA VERİLDİ

"Açıq havada idman yarışlarının keçirilməsi ilə bağlı Operativ Qərargahın tibbi bölməsinə metodik tövsiyələrin hazırlanması ilə bağlı bu günlərdə tapşırıq verildi".  
 
YAZTV  xəbər verir ki, bunu “Tibbi Ərazi Bölmələrini İdarəetmə Birliyi”nin (TƏBİB) İdarə Heyətinin sədri Ramin Bayramlı Nazirlər Kabineti yanında Operativ Qərargahın brifinqində çıxışı zamanı deyib.
 
"Demək olar ki, metodik tövsiyələr artıq hazırlanıb və tamamlanıb. Qərargahın rəhbərliyinə təsdiq üçün təqdim edilib. Təsdiqdən sonra sizlərin diqqətinə çatdırılacaq. Burada bir sıra ölkələrin təcrübəsindən istifadə etmişik. Bizi narahat edən məqam geyinib-soyunma otaqları və duş yerləridir. Buradakı qaydaların necə olacağı metodik tövsiyələrdə əks olunacaq. Fiziki məsafənin gözlənilməsi açıq idman sahələrində ən vacib şərtdir. Qapalı idman müəssələrinin açılması yaxın günlərdə gözlənilmir. 
Previous Next

Məktəbli şahmatçılardan Avropa çempionatında yüksək nəticə

Təhsil Nazirliyindən YAZTV-ə verilən məlumata görə, 16-31 may 2020-ci il tarixlərində Avropa Şahmat Birliyinin təşkilatçılığı ilə şahmat üzrə onlayn Avropa çempionatı keçirilib.

40 ölkədən 21 qrossmeyster, 48 beynəlxalq usta, 85 FİDE ustası olmaqla ümumilikdə 277 şahmatçının iştirak etdiyi çempionatın D qrupunda reytinqi 2300-dək olan şahmatçılar arasında mübarizə aparan Sumqayıt şəhəri 2 nömrəli Uşaq-Gənclər İdman-Şahmat Məktəbinin yetirməsi, beynəlxalq usta Murad İbrahimli 8 oyundan 7,5 xal toplayaraq Avropa çempionu elan edilib. “Təhsil” Respublika İdman Mərkəzinin 4 nömrəli İxtisaslaşdırılmış Olimpiya Ehtiyatları Uşaq-Gənclər İdman-Şahmat Məktəbinin yetirməsi Abdulla Qədimbəyli isə 2-ci yerə layiq görülüb.

53 ölkədən 1600-dək şahmatçının qatıldığı çempionatın A qrupunda reytinqi 1400-ə qədər olan şahmatçılar arasında çıxış edən digər şahmatçımız, Sumqayıt şəhəri 2 nömrəli Uşaq-Gənclər İdman-Şahmat Məktəbinin yetirməsi Selcan İsmayıl 8 oyundan 6,5 xal toplayaraq qadınlar arasında 2-ci yeri tutub.

Turnirin linki:

https://chess-results.com/tnr527492.aspx?lan=34&art=1&turdet=YES&flag=30

Olimpiya komplekslərində məşqlərə icazə verildi

Olimpiya komplekslərində məşqlərə icazə verildi

Gənclər və İdman Nazirliyi Nazirlər Kabineti yanında Operativ Qərargahın açıq havada idman tədbirlərinin keçirilməsinə verdiyi icazə ilə bağlı açıqlama yayıb.

Nazirliyin Mətbuat katibi Səmayə Məmmədovanın YAZTV-ə verdiyi məlumata görə, açıqlamada bildirilir:

"Gənclər və İdman Nazirliyinin balansında olan Olimpiya komplekslərinin və digər idman təyinatlı obyektlərin açıq havada yerləşən meydança və qurğuları əhalinin istifadəsinə verilir;

Federasiyaların nazirliyə sifarişləri nəzərə alınaraq, Operativ Qərargahın razılığı əsasında idmançıların yoxlanılması, onların xüsusi karantin qaydalarına əməl etmələri və federasiyaların nazirliyə gündəlik hesabatlar vermələri şərti ilə idman növləri üzrə yığma komandaların qapalı şəraitdə müxtəlif Olimpiya komplekslərində məşqlərinə icazə verilir;

İdmançıların regionlardakı Olimpiya komplekslərinə məşqlər üçün ezam olunmaları xüsusi icazə qaydaları (ezamiyyə icazəsi) əsasında aparılacaq".

Açıq havada keçirilən idman yarışlarına icazə verildi

Açıq havada keçirilən idman yarışlarına icazə verildi

Azərbaycanda açıq havada keçirilən idman yarışlarının təşkilinə icazə verilib.

Bu barədə YAZTV-ə Nazirlər Kabineti yanında Operativ Qərargahdan bildirilib.

Lakin yarışlarda tamaşaçılar iştirak etməyəcək.