Sunday, 29 Yanvar 2023 16:19
Yeni Azərbaycan Televiziyası
Bakı
İstanbul
Moskva
Elcan Haciyev Qran Pri turnirində gümüş medal qazandı

Elcan Haciyev Qran Pri turnirində gümüş medal qazandı

YAZTV xəbər verir ki, 27-29 yanvar Portuqaliyanın Almada şəhərində keçirilən Qran Pri turnirinin ikinci günündə -81 kq. çəki dərəcəsində mübarizə aparan cüdoçumuz Elcan Hacıyev yarışı gümüş medalla başa vurub.

Qeyd edək ki, idmançımız 2022-ci ildə Çexiyanın paytaxtı Praqada gənclər arasında keçirilən Avropa çempionatında qızıl medal qazanıb.

Azərbaycan çempionatlarında növbəti oyunların vaxtı dəqiqləşib.

Azərbaycan çempionatlarında növbəti oyunların vaxtı dəqiqləşib.

Kişilər və qadınlar arasında Azərbaycan çempionatlarında növbəti oyunların vaxtı dəqiqləşib.

Yanvarın 12-də kişi voleybolçular arasında Yüksək Liqada I dövrənin növbəti oyunları keçiriləcək. Həmin gün baş tutacaq II tura saat 16:00-da “Neftçi” - “Xarı bülbül” görüşü ilə start veriləcək. Ardınca saat 18:00-da MOİK və “Murov” qarşılaşması keçiriləcək. Hər iki görüş Voleybol Mərkəzində təşkil olunacaq.

Yanvarın 13-də isə qadın voleybolçular arasında Yüksək Liqada II turun oyunlarına start veriləcək. Voleybol Mərkəzində təşkil olunacaq turun ilk matçı saat 16:00-da “Azərreyl” və “Abşeron” komandaları arasında baş tutacaq. Bu qarşılaşmadan 2 saat sonra “Murov” - UNEC dueli start götürəcək.

Xatırladaq ki, kişi voleybolçular arasında Azərbaycan Yüksək Liqasında ilk turdan sonra aktivinə 3 xal yazdırmış “Xarı bülbül” və “Murov” turnir cədvəlində 1-ci və 2-ci yerlərdə qərarlaşıblar. “Neftçi” və MOİK-in isə hələ ki, xalı yoxdur.
Qadın voleybolçular arasında Azərbaycan Yüksək Liqasında isə I turdan sonra hərəyə 3 xal qazanmış “Azərreyl” və “Murov” turnir cədvəlində 1-ci və 2-ci yerlərdə qərarlaşıblar. “Abşeron” və UNEC isə turu xalsız başa vurub.

Bu idmançılara 70 min manat veriləcək - RƏSMİ

Bu idmançılara 70 min manat veriləcək - RƏSMİ

Türkiyənin Konya şəhərindəki V İslam Həmrəyliyi Oyunlarında ən yüksək nəticələr göstərmiş idmançılar, onların məşqçiləri və hazırlıq prosesində iştirak etmiş digər mütəxəssislərin mükafatlandırılması haqqında Azərbaycan Respublikası Prezidentinin Sərəncamına əsasən, mükafatların ödənilməsinə başlanılıb.

YAZTV xəbər verir ki, Gənclər və İdman Nazirliyindən verilən məlumata görə, ümumilikdə, 188 idmançı, 94 məşqçi və idman mütəxəssisini əhatə edən mükafatlandırma qaydalarında bir sıra yeniliklər tətbiq edilir. Yeniliklər idmançıların motivasiyası və onların nəticələrinin qarşıdakı illərdə də yüksəldilməsinə xidmət edir. Buna görə də, əsas yenilik idmançıların hazırlığında rolu olan hər kəsin mükafat almasıdır. Təkcə məşqçilər deyil, eyni zamanda, idmançıların yarışlara hazırlığı prosesində əməyi olan digər mütəxəssislər (həkim, fizioterapevt, menecerlər) və eləcə də həmin yarışlarda ölkəmizi təmsil etmiş hakimlərə də mükafat müəyyən edilib. İdmançıların qazandığı medalın əyarından asılı olmayaraq, həmin mütəxəssislər 10 000 manat məbləğində mükafatlandırılacaqlar.

Digər yenilik odur ki, baş məşqçi, şəxsi məşqçi, köməkçi məşqçi və ya digər mütəxəssislər yalnız bir vəzifə üzrə mükafat alacaqlar. Milliləşdirilmiş idmançıların əldə etdiyi ən yüksək nəticələrə görə onların şəxsi məşqçiləri mükafatlandırılmır. Komanda yarışlarında ən yüksək nəticələrə görə baş məşqçi və köməkçi məşqçilər komandanın tutduğu yerdən asılı olaraq, fərdi idman növlərində baş məşqçi və köməkçi məşqçilərlə eyni məbləğdə mükafatlandırılırlar.

Daha bir yenilik idmançılara verilən mükafatların hissə-hissə ödənilməsidir. Əvvəlki illərin təcrübəsi göstərir ki, idmançıların böyük məbləğdə mükafatı bir dəfəyə alması bəzi hallarda onların idmançı karyerasını davam etdirməsinə marağı azaldır. Buna görə də onları sonrakı illərdə aktiv idman karyeralarını davam etdirməyə sövq etmək məqsədilə idmançılara verilən mükafatlar mərhələli şəkildə 3 il ərzində ödəniləcək Mükafat eyni zamanda idmançıların bundan sonrakı idman karyerasına dəstək üçün verilir. İdmançılar üçün nəzərdə tutulan mükafatın 40%-i 2022-ci ildə, 30%-i 2023-cü ilin 4-cü rübündə; qalan 30%-i 2024-cü ilin 4-cü rübündə ödəniləcək. İdmançıya antidopinq qayda pozuntusuna görə sanksiya tətbiq olunduğu halda mükafat ödənilməyəcək.

İdmançılar və məşqçilər üçün nəzərdə tutulan mükafatların ödənilməsi 2 kateqoriya üzrə tənzimlənir. Fərdi yarışlarda qazanılan nəticələrə görə, birinci yer üçün mükafat 70 000 manat, ikinci yer üçün 50 000 manat, üçüncü yer üçün 30 000 manat müəyyən edilib. Cütlük, üçlük və ya komanda hesabı proqramı üzrə medal qazanan idmançılar arasında mükafatın məbləği onların sayına uyğun olaraq, bərabər şəkildə bölünür.

Komanda idman növlərində verilən mükafat bir medala görə müəyyənləşdirilərək bölündüyü üçün və bu halda idmançılara düşən məbləğ nisbətən az olduğundan komanda üzvlərinə ayrılan mükafat fərqli yanaşma ilə nəzərə alınıb. Basketbol (3x3), bədii gimnastika (qrup hərəkətləri üzrə komanda) həndbol, futbol və voleybol idman növləri üzrə qazanılan medallara görə, komandanın hər bir üzvünə birinci yer üçün 40 000 manat, ikinci yer üçün 30 000 manat, üçüncü yer üçün isə 20 000 manat ödənilir.

Daha bir yenilik, bölgü zamanı əldə edilən uğurun çətinliyinin nəzərə alınmasıdır. Rəqabətin az olduğu çəki dərəcələrində medal qazanmış idmançılara verilən mükafat 5000 manat təşkil edir.

Azərbaycan Respublikası Gənclər və İdman Nazirliyinin bəyanatı

Azərbaycan Respublikası Gənclər və İdman Nazirliyinin bəyanatı

Hazırda davam edən “Böyük dəbilqə” seriyalı “Australia Open” tennis turniri çərçivəsində 20 yanvar 2023-cü il tarixində baş tutan oyun zamanı erməni əsilli Rusiya idmançısı Karen Xaçanov rəqibinə qalib gəldikdən sonra idmançı adına yaraşmayan, Beynəlxalq Tennis Federasiyasının və hazırda iştirak etdiyi turnirin davranış qaydalarına zidd olan təxribat törətmiş və beynəlxalq turnirlərdə çıxış edən tennisçilərə məxsus bir ənənəni siyasiləşdirməyə cəhd etmişdir. Eyni hal idmançı tərəfindən turnirin növbəti mərhələsi çərçivəsində baş tutan oyundan sonra da təkrarlanmışdır.

YAZTV xəbər verir ki, Baş vermiş hallarla bağlı Azərbaycan Respublikasının Gənclər və İdman Nazirliyi və Azərbaycan Tennis Federasiyası tərəfindən ikitərəfli qaydada Rusiya Federasiyasının müvafiq qurumlarına, eləcə də Beynəlxalq Tennis Federasiyası və “Australia Open” tennis turnirinin təşkilatçılarına müvafiq müraciətlər ünvanlanmış, bu təxribatçı addımlarına görə tennisçinin cəzalandırılması və belə bir halın təkrarlanmasına yol verilməməsi tələb edilmişdir.

Rusiya Federasiyasının müvafiq qurumları tərəfindən məsələnin araşdırılacağı və idmançıya müvafiq xəbərdarlığın olunacağı vəd edilmişdir.

Ötən il gimnastlarımız beynəlxalq yarışlarda 147 medal qazanıblar

Ötən il gimnastlarımız beynəlxalq yarışlarda 147 medal qazanıblar

2022-ci il Azərbaycan Gimnastika Federasiyası (AGF) üçün bir sıra əlamətdar hadisələrlə yadda qaldı.

Ötən il yenidən qurulmasının 20 illiyini qeyd edən AGF-in təmsilçiləri yubiley ilində qazandıqları tarixi nailiyyətlərlə azarkeşləri sevindirdilər.

YAZTV xəbər verir ki, AGF-in son 20 ildə qazandığı uğurların təməli 2002-ci il oktyabrın 7-də Azərbaycan Respublikasının Birinci vitse-prezidenti Mehriban xanım Əliyevanın federasiyanın prezidenti seçilməsi ilə qoyulub. Fəxrlə qeyd olunmalıdır ki, həmin dövrdən başlayaraq, həyata keçirilən uğurlu strategiya nəticəsində ölkəmizdə idmanın bu növünün yeni mərhələsi və sürətli inkişafı başlanıb, AGF qısa müddət ərzində ölkənin seçilən idman federasiyasına çevrilib.

Federasiya ötən illərdəki ənənənin davamı olaraq, 2022-ci ildə Azərbaycan gimnastika növləri üzrə 5 dünya səviyyəli yarışa və bir sıra ölkədaxili çempionat və birinciliklərə uğurla ev sahibliyi edib. Paytaxtımızda keçirilən beynəlxalq yarışların hər birində gimnastlarımız onlara bəslənilən ümidləri doğruldaraq fəxri kürsüdə yer alıblar.

İlin ilk beynəlxalq yarışında - batut gimnastikası üzrə dünya kuboku turnirində (12-13 fevral) yığma komandamızın üzvü Selcan Mahsudovanın fərdi çıxışda əldə etdiyi gümüş medal Azərbaycanın gimnastika tarixində bu növ üzrə qadınlar arasında fərdi növdə qazanılan ilk medal olub.

Daha bir ilkə akrobatika gimnastikası üzrə təmsilçilərimiz imza atdılar. Martın 3-dən 6-dək Bakıda akrobatika gimnastikası üzrə keçirilən 12-ci dünya yaş qrupları yarışlarında Leyla Bəşirova, Nəzrin Fərmanova, Mənsumə Məmmədzadədən ibarət qadın qrupumuz 13-19 yaş kateqoriyasında qızıl medala sahib çıxıb. Bu medal ölkəmizin akrobatika gimnastikası tarixində dünya yaş qrupları yarışlarında qazanılan ilk qızıl medal kimi yadda qalıb.

Martın 10-dan 13-dək Bakı gimnastikanın maraqlı və həyəcanlı növlərindən biri olan akrobatika gimnastikası üzrə dünya çempionatına ilk dəfə ev sahibliyi edib. Ən güclülərin yarışında qarışıq cütlüyümüz, Avropa çempionatının gümüş və bürünc mükafatçıları Ağasif Rəhimov və Raziyə Seyidli temp hərəkətləri proqramında gümüş, Daniel Abbasov və Murad Rəfiyevdən ibarət kişi cütlüyümüz isə qarışıq və temp hərəkətləri üzrə bürünc medala sahib çıxıblar. Hər iki medal akrobatika gimnastikası üzrə dünya çempionatında qazanılan ilk nailiyyət kimi tarixə yazılıb.

İdman gimnastikası üzrə keçirilən (31 mart - 3 aprel) dünya kuboku yarışı yığma komandamızın üzvü Nikita Simonovun halqa ilə hərəkətlərdə qazandığı bürünc medalı ilə əlamətdar olub.

Gimnastikanın ən zərif nümayəndələrinin iştirak etdiyi bədii gimnastika üzrə dünya kuboku yarışında da (22-24 aprel) təmsilçilərimiz onlara bəslənilən ümidləri doğruldublar. Belə ki, qrup hərəkətləri komandamızın üzvləri Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan, Darya Sorokina 5 halqa ilə qızıl, çoxnövçülükdə gümüş medal qazandılar.

2021-ci ildə ölkəmizdə mövcud karantin qaydalarına uyğun olaraq gimnastika növləri üzrə irimiqyaslı beynəlxalq yarışlar təşkil olunsa da, pandemiya ilə əlaqədar 2020-2021-ci illər ərzində yerli yarışların keçirilməsi təxirə salınmışdı. 2022-ci ilin əvvəlindən etibarən mövcud tələblərə uyğun olaraq gimnastika növləri üzrə milli yarışlar bərpa olunmuşdu. Gimnastika növləri üzrə keçirilən Azərbaycan və Bakı çempionatları idmançıların çoxdandır səbirsizliklə gözlədiyi yerli yarış əhval-ruhiyyəsini, həyəcanını yenidən Milli Gimnastika Arenasına qaytardı.

Martın 16-17-də keçirilən bədii gimnastika üzrə Azərbaycan çempionatından etibarən tamaşaçılar ikiillik fasilədən sonra yenidən Milli Gimnastika Arenasında gimnastların rəngarəng çıxışlarını izləmək imkanı qazandılar.

Ötən il gimnastlarımız beynəlxalq arenalarda keçirilən yarışlarda da öz medalları ilə xalqımızı sevindirməyə davam ediblər. Təmsilçilərimiz bu günədək uğur əldə edilməyən gimnastikanın bəzi növləri və proqramlarında nailiyyət qazandılar. Yığma komandamızın üzvləri gimnastika növləri üzrə müxtəlif beynəlxalq turnirlər, dünya kuboku yarışları ilə yanaşı, ilin əsas yarışları olan Avropa və dünya çempionatları, eləcə də İslam Həmrəyliyi Oyunları və Ümumdünya Oyunlarında qazandıqları nəticələrlə ölkəmizin medal kolleksiyasını zənginləşdiriblər.

İtaliyanın Rimini şəhərində keçirilən batut gimnastikası və tamblinq üzrə üzrə Avropa çempionatında (1-5 iyun) idmançımız Maqsud Mahsudov gənclər arasında batut gimnastikası üzrə fərdi növdə və komanda yoldaşı Hüseyn Abbasovla birgə sinxron cütlüklər proqramında qızıl medal qazanıb. Tamblinq üzrə yarışlarda isə Mixail Malkin fərdi növdə gümüş, yığma komandanın üzvləri Adil Hacızadə və Tofiq Əliyevlə birgə komanda hesabında bürünc medal əldə ediblər.

Bu yarışın ardınca bədii gimnastlarımız İsrailin Tel-Əviv şəhərində keçirilən Avropa çempionatında (15-19 iyun) mübarizəyə qoşulublar. Qitə çempionatında gənc gimnastımız Kamila Qafarova fərdi növdə gürzlərlə, Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan, Darya Sorokinadan ibarət qrup hərəkətləri komandamız isə çoxnövçülük, 5 halqa, eləcə də 3 lent və 2 topla hərəkətlərin icrasına görə bürünc medala sahib çıxıblar.

2021-ci ildə keçirilməsi planlaşdırılan, məlum səbəblərdən təxirə salınan ötən ilin əsas yarışlarından biri olan V İslam Həmrəyliyi Oyunlarında ölkəmiz 4 gimnastika növündə (bədii gimnastika, aerobika gimnastikası, kişi və qadın idman gimnastikası) təmsil olundu. Komandamızın üzvləri 8-i qızıl, 7-si gümüş, 2-si bürünc medal olmaqla ümumilikdə 17 medal əldə ediblər.

ABŞ-ın Birminqem şəhərinin ev sahibliyi etdiyi 11-ci Ümumdünya Oyunlarında (7-17 iyul) aerobika gimnastikası üzrə təmsilçilərimiz fərqləniblər. Yarışlarda Ayxan Əhmədli, Rauf Hacıyev, Nigar Mir Cəlallı, Nəzrin Mustafayeva, Mədinə Mustafayeva, Sənan Mahmudlu, Xədicə Quliyeva və Vladimir Dolmatovdan ibarət Azərbaycanın aerodans komandası bürünc medala sahib çıxıb.

İyulun 24-dən 30-dək Slovakiyanın Banska Bistritsa şəhərində keçirilən Avropa Gənclər XVI Yay Olimpiya Festivalında qadın idman gimnastikası tariximizdə ilk dəfə olaraq gənc idmançımız Nazənin Teymurova dayaqlı tullanma üzrə finala vəsiqə qazanaraq 5-ci pillədə qərarlaşıb. İdmançımız Avropa çempionatında da finala vəsiqə qazanaraq eyni uğuru təkrarlayıb.

Bolqarıstanın Sofiya şəhərində bədii gimnastika üzrə qrup komandamız (Güllü Ağalarzadə, Ləman Əlimuradova, Zeynəb Hümmətova, Yelizaveta Luzan və Darya Sorokina) ilk dəfə olaraq dünya çempionatında (14-18 sentyabr) fəxri kürsüyə (bürünc medal) yüksəlib.

Eyni şəhərdə keçirilən batut gimnastikası, tamblinq və ikili mini-batut üzrə 29-cu dünya yaş qrupları yarışları (23-26 noyabr) da Azərbaycan yığma komandası üçün məhsuldar olub. İdmançılarımız medal xəzinəmizə bütün əyarlı mükafatları əlavə ediblər. Batut gimnastikası üzrə sinxron proqramda 15-16 yaş kateqoriyasında mübarizə aparan Maqsud Mahsudov və Hüseyn Abbasov qızıl medala layiq görulüblər. Fərdi batut proqramında 13-14 yaş kateqoriyasında çıxış edən Əli Niftəliyev gümüş medal qazanıb. Maqsud Mahsudov 15-16 yaş kateqoriyasında fərdi proqramda, Ammar Baxşalıyev və Fərhad Mustafayev isə 11-12 yaş kateqoriyasında sinxron cütlüklərin yarışında bürünc medala sahib çıxıblar. Tamblinq üzrə yarışda isə 17-21 yaş kateqoriyasında çıxış edən Tofiq Əliyev gümüş medal əldə edib.

Ötən il gimnastika hamı üçün növü üzrə təmsilçilərimiz də bir sıra yarışlarda fərqləniblər. “Ay işığı” komandası (10-14 iyul) Nevşatel şəhərində (İsveçrə) keçirilən “European Gym for Life Challenge” festivalında gümüş medala layiq görülüb. Komandamızın Portuqaliyanın Funşal şəhərində (2-7 oktyabr) keçirilən “Qızıl Yaş” (“Golden Age” - 50 yaş və yuxarı) gimnastika festivalında təqdim etdiyi kompozisiya maraqla qarşılanıb.

2022-ci il ərzində gimnastlarımız beynəlxalq səviyyəli yarışlarda 62-si qızıl, 40-ı gümüş və 45-i bürünc olmaqla ümumilikdə 147 medal əldə ediblər. Bu uğurların məntiqi nəticəsidir ki, təmsilçilərimiz Azərbaycan idmançılarının reytinq cədvəlində mütəmadi olaraq liderliyini qoruyub saxladılar.

Ötən ilin sentyabrında Dənizkənarı bulvarda AGF-in yenidən qurulmasının 20 illiyinə həsr olunmuş gimnastika hamı üçün növü üzrə festival keçirilib. İlk dəfə olaraq təşkil edilən tədbir şəhərimizin sakinlərinə xoş anlar bəxş edib və izləyicilərin böyük marağına səbəb olub.

AGF hər zaman olduğu kimi ötən il də məşqçilərin və hakimlərin ixtisaslarının artırılmasını diqqətdə saxlayıb. Beynəlxalq Gimnastika Federasiyası (FIG) tərəfindən 2022-2024-cü illəri əhatə edən növbəti Olimpiya dövrünün müvafiq qaydalarına əsasən, təmsilçilərimiz gimnastika növləri üzrə hakimlik imtahanlarında iştirak ediblər. COVID-19 pandemiyası ilə əlaqədar onlayn qaydada keçirilən imtahanlarda təmsilçilərimizin hər biri imtahanı müvəffəqiyyətlə başa vuraraq beynəlxalq hakimlik kateqoriyasına yiyələniblər.

2022-ci ilin oktyabrında Milli Gimnastika Arenasında AGF-in təşkilatçılığı ilə ilk dəfə olaraq Azərbaycan Dövlət Bədən Tərbiyəsi və İdman Akademiyası tərəfindən Xüsusi Olimpiya üzrə yunanıstanlı mütəxəssis Sofiya Buranın rəhbərliyi altında məşqçilik (bədii gimnastika, gimnastika hamı üçün) və hakimlik (bədii gimnastika) kursları keçirilib. Sentyabrda isə FIG Atletlər Komissiyasının üzvü, bədii gimnastika üzrə Azərbaycan yığma komandasının məşqçisi Siyana Vasileva, FIG Texniki Komitəsinin prezidenti Noha Abuşabana ilə ilk dəfə olaraq birgə videokonfrans formatında idmançılar üçün onlayn vebinar keçirib. Seminarda bir sıra aktual məsələlərə toxunulub, maraqlı mövzular ətrafında müzakirələr aparılıb.

Hər il olduğu kimi, 2022-ci ildə də regionlarda gimnastikanın inkişafı, bu sahədə kütləviliyin təmin olunması, gimnastika növlərinin populyarlaşdırılması federasiyanın fəaliyyətinin əsas prioritet istiqamətini təşkil edib. Hazırda respublikamızın 29 bölgəsində gimnastika bölməsi fəaliyyət göstərir. Hesabat ilində ölkəmizdə 8 yeni gimnastika bölməsi (Tərtər, Goranboy, Gədəbəy, Oğuz, Qəbələ, Balaxanı, Ramanı, Lənkəran şəhər Osman Mirzəyev adına qarışıq tipli uşaq evinin sakinləri üçün gimnastika bölməsi) fəaliyyətə başlayıb ki, onlardan 5-i məhz regionların payına düşüb.

Federasiya tərəfindən ilboyu bölgələrdə mötəbər yarışlar öncəsi yoxlama məşqləri, tanınmış gimnastlarımızın iştirakı ilə müxtəlif nümunəvi çıxışlar, ustad dərsləri və s. təşkil edilib.

Bölgədə gimnastikanın təbliği məqsədilə 28 May Müstəqillik Gününə həsr edilmiş “Dostluq yarışı” ilk dəfə olaraq Şəki Olimpiya İdman Kompleksində keçirilib. İyunun 4-5-də ilk dəfə olaraq Tərtər Olimpiya İdman Kompleksi öz qapılarını bədii gimnastların üzünə açıb. Bu növ üzrə keçirilən 6-cı bölgələrarası kubok yarışı Tərtər sakinlərinin böyük sevincinə səbəb olub. Bölgədə təşkil olunan ilin ən böyük yarışı dekabrın 8-dən 11-dək Şəki Olimpiya İdman Kompleksində gimnastikanın 6 növü üzrə keçirilən Azərbaycan Gimnastika Federasiyasının yenidən qurulmasının 20 illiyinə həsr olunmuş birgə yarışlar olub. Yarışların açılış mərasimi zamanı tamaşaçılara yerli və dünya şöhrətli gimnastika ulduzlarının ifasında qala-şou təqdim olunub. Azərbaycana dəvət olunmuş əcnəbi qonaqlar yarışın təşkilatçılığını yüksək qiymətləndirərək, ölkəmizə, eləcə də qədim Şəki şəhərinə olan heyranlığını ifadə ediblər.

2022-ci ildə də Milli Gimnastika Arenası yenidən digər ölkə nümayəndələri üçün öz qapılarını açıb. Avstraliya, Böyük Britaniya, Bolqarıstan, Qazaxıstan, Filippin, Gürcüstan, Hindistan, İspaniya, İsrail, Koreya, Kolumbiya, Latviya, Malayziya, Misir, Macarıstan, Monqolustan, Norveç, Özbəkistan, Portuqaliya, Polşa, Sloveniya, Slovakiya, Syerra Leone, Türkiyə, Ukrayna, Yaponiya, İran, Qırğızıstan kimi ölkələrin nümayəndələri dünyanın ən möhtəşəm arenasında yerli mütəxəssis və idmançılarımızla birgə təlim-məşq toplanışında iştirak edərək öz idman təcrübələrini artırıblar.

Ötən il təmsilçilərimizin fəaliyyəti həm yerli, həm də beynəlxalq qurumlar tərəfindən yüksək qiymətləndirilib. Gimnastımız Selcan Mahsudova İsveçrənin Arosa şəhərində batut gimnastikası üzrə keçirilən dünya kuboku yarışında (1-2 iyul) 2022-ci il ərzində iştirak etdiyi dörd dünya kubokundan üçündə topladığı xalların cəminə əsasən, FIG kubokuna sahib çıxıb.

Dördüncü İslam Həmrəyliyi Oyunlarının qalibi, V İslam Həmrəyliyi Oyunlarının üçqat qızıl, gümüş və bürünc mükafatçısı, Yay Universiadasının ikiqat gümüş mükafatçısı, Tokio Yay Olimpiya Oyunlarının iştirakçısı Zöhrə Ağamirova Azərbaycan Milli Olimpiya Komitəsinin Atletlər Komissiyasının üzvü seçilib.

İngiltərənin Liverpul şəhərində kişi və qadın idman gimnastikası üzrə keçirilən dünya çempionatında Nikita Simonovun halqaların icrası üzrə təqdim etdiyi yeni element FIG-nin kişi idman gimnastikası üzrə Texniki Komitəsi tərəfindən təsdiq edilib.

Sentyabrda Lüksemburq şəhərində “TeamGym” üzrə keçirilən 14-cü Avropa çempionatında Azərbaycan yığma komandasının üzvü Tofiq Əliyev ilk dəfə olaraq Avropa Gimnastikasının təsis etdiyi “Bütün ulduzlar komandası” nominasiyasında akrobatika cığırı alətində ən çətin elementin icrasına görə qalib olub.

Ötən ilin ən mühüm xəbəri dekabra təsadüf edib. Belə ki, ayın 2-3-də Portuqaliyanın Albufeira şəhərində keçirilən Avropa Gimnastikasının 29-cu Konqresində Azərbaycan gənclər və idman naziri Fərid Qayıbov yüz faiz səs çoxluğu ilə qitənin ən nüfuzlu gimnastika təşkilatına - Avropa Gimnastikasına yenidən prezident seçilib. AGF tərəfindən namizədlikləri irəli sürülən beynəlxalq dərəcəli hakimlər Yevgeniya Vilyayeva bədii gimnastika, İnara İsrafilbəyova “TeamGym”, yığma komandanın məşqçisi Ruslan Eyvazov isə gimnastika hamı üçün növü üzrə Azərbaycan gimnastika tarixində ilk dəfə olaraq Avropa Gimnastikasının Texniki Komitəsinin üzvü seçiliblər.

Ənənəyə uyğun olaraq, bu dəfə də federasiya Yeni il ərəfəsində bütün gimnastikasevərləri yenidən bir araya topladı. Gimnast və məşqçilərin iştirakı ilə baş tutan “Soyuq ürək” adlı möhtəşəm Yeni il şousu bütün tamaşaçılara əyləncəli anlar yaşadıb.

İdman rəsmilərinin iştirakı ilə keçirilən AGF-nin yenidən qurulmasının 20 illiyinə həsr olunmuş yubiley tədbiri bir sıra maraqlı məqamları ilə yadda qalıb. Federasiyanın 20 illik uğurlu inkişaf yolundan bəhs edən videoçarxın təqdim olunduğu mərasimdə, həmçinin AGF-nin “20 il inkişafda” adlı kitabının təqdimat mərasimi keçirilib.

Dekabrın 26-da Gənclər və İdman Nazirliyinin 2022-ci ilin idman yekunlarına həsr olunmuş qala mərasimində AGFt-in təmsilçiləri 9 nominasiya üzrə ilin ən yaxşıları sırasında yer alıb, bədii gimnastika üzrə qrup komandamız və 3 fərdi gimnastımız reytinq cədvəlində 2022-ci ili ilk onluqda başa vuran idmançılarla birgə mükafatlandırılıb.

Yeni il ərəfəsində federasiyanın baş katibi Nurlana Məmmədzadənin Azərbaycan Prezidenti İlham Əliyevin Sərəncamı ilə ölkəmizdə idmanın inkişafında xidmətlərinə görə “Tərəqqi” medalı ilə təltif edilməsi AGF-in uğurlu fəaliyyətinin daha bir göstəricisi olub.

"Qarabağ" və "Neftçi"nin start heyətləri bəlli oldu

"Qarabağ" və "Neftçi"nin start heyətləri bəlli oldu

Futbol üzrə Azərbaycan Premyer Liqasının VIII turunda üz-üzə gələcək "Qarabağ" və "Neftçi"nin start heyətləri açıqlanıb.

YAZTV  xəbər verir ki, komandalar meydana aşağıdakı "11-lik"lərlə çıxacaqlar:

“Qarabağ”: 1. Şahruddin Məhəmmədəliyev 7. Riçard Almeyda 55. Bədavi Hüseynov 2. Qara Qarayev (k) 13. Bəhlul Mustafazadə 44. Elvin Cəfərquliyev 29. Marko Veşoviç 10. Abdullah Zubir 20. Kadi Borqes 11. Kvabena Ovusu 15. Leandro Andrade

Ehtiyat oyunçular: 23. Luka Quqeşaşvili 89. Amin Ramazanov 5. Maksim Medvedev 19. Filip Ozobiç 30. Abbas Hüseynov 77. Ramil Şeydayev 18. İsmayıl İbrahimli 27. Toral Bayramov 22. Musa Qurbanlı 81. Kevin Medina 8. Marko Yankoviç 6. Julio Romao

Baş məşqçi: Qurban Qurbanov

“Neftçi”: 30. Aqil Məmmədov 8. Emin Mahmudov (k) 14. Eddi İsrafilov 26. Ömər Buludov 6. Voyislav Stankoviç 3. Mamadu Mbodj 5. Kenni Sayef 7. Azər Əliyev 23. Ataa Caber 11. Qodsvey Donyo 24. Yusuf Laval

Ehtiyat oyunçular: 1. İvan Brkiç 93. Rza Cəfərov 17. Rəhman Hacıyev 2. Mert Çelik 21. İsmayıl Zülfüqarlı 20. Vüsal Əsgərov 27. Fərid Yusifli 82. Rüfət Abbasov 78. Elcan Əbilov 4. Solomon Kverkveliya 77. Yeqor Boqomolski 16. Gilyerme Pato

Baş məşqçi: Laurentsiu Regekampf

Qeyd edək ki, bu gün "Azersun Arena"da keçiriləcək qarşılaşma saat 18:00-da başlayacaq.

Əməkdar məşqçi Şahmar Nağıyevin yetirmələri növbəti uğura imza atıb

Əməkdar məşqçi Şahmar Nağıyevin yetirmələri növbəti uğura imza atıb

19-21 dekabr 2022-ci ildə taekvondo üzrə ölkə birinciliyi keçirilib. 

Yaztv.az xəbər verir ki, yarışda Şahmar müəllimin yetirmələri, İsgəndərli Səyid 45 kq çəki dərəcəsində 2-ci yerə Hüseynova Səma 55 kq 3-yerə layiq görülüblər.

Nəticə vermiş idmançılar taekvondo üzrə milli komandanın heyətinə cəlb ediliblər.

Azərbaycanda MMA və kikboksinq gecəsi keçiriləcək

Azərbaycanda MMA və kikboksinq gecəsi keçiriləcək

24 dekabr 2022-ci il tarixdə Azərbaycan Boks Federasiyasının Arenasında “Zabit Samedov Fight Club” MMC tərəfindən Azərbaycanda ilk də New Generation Fighting (Yeni Nəsil Doyüşü) peşəkar MMA və kikboksinq gecəsi keçiriləcəkdir.

 

Tədbirin təntənəli açılış mərasimi saat 18:00-da təşkil ediləcəkdir. Tamaşaçı qismində peşəkar döyüşləri izləmək istəyən hərkəs məkana dəvətlidir (Arenaya giriş sərbəstdir).

Cüdo yığmamızın dünya çempionatı üçün heyəti açıqlandı

Cüdo yığmamızın dünya çempionatı üçün heyəti açıqlandı

Dünya çempionatı üçün heyət açıqlanıb

6-13 oktyabr 2022-ci ildə Özbəkistanın paytaxtı Daşkənd şəhərində böyüklər arasında Dünya çempionatı keçiriləcək. Beynəlxalq səviyyədə bu ilin cüdo üzrə ən mötəbər yarışı olan bu çempionatda Azərbaycanı 11 idmançı təmsil edəcək. Mundiala ümumilikdə 80-dən çox ölkədən 500-dən çox idmançı qatılacaq.

Cüdoçularımıza performans direktor Mark van der Ham, kişilərdən ibarət milli yığmanın baş məşqçisi Riçard Trautman, qadınlardan ibarət milli yığmanın baş məşqçisi Rəşad Məmmədov, böyük məşqçilər Mövlud Mirəliyev, Elçin İsmayılov və Mehman Əzizov, böyük performans analitik Zaur Babayev rəhbərlik edəcəklər. 

Dünya çempionatında fərdi yarışlar 6-12 oktyabr tarixlərində, komanda yarışları isə 13 oktyabrda Daşkənddə yerləşən “Humo Arena”-da keçiriləcək. Fərdi yarışlarda təmsil olunacaq Azərbaycan milli yığmasının heyəti aşağıdakı kimidir:

Qadınlar

-48 kq. 

Leyla Əliyeva 

-52 kq. 

Gültac Məmmədəliyeva

Kişilər

-60 kq. 

Kəramət Hüseynov

 

-66 kq. 

Orxan Səfərov 

Yaşar Nəcəfov 

-73 kq. 

Rüstəm Orucov 

Hidayət Heydərov 

-81 kq. 

Səid Mollayi 

-90 kq. 

Məmmədəli Mehdiyev 

-100 kq. 

Zelim Kotsoyev 

+100 kq. 

Uşanqi Kokauri

İdmançılarımıza uğurlar arzulayırıq!

 

Bakı həndbol üzrə Avropa çempionatının təsnifat turnirinə ev sahibliyi edəcək

Bakı həndbol üzrə Avropa çempionatının təsnifat turnirinə ev sahibliyi edəcək

Kişi həndbolçular arasında 2026-cı ildə keçiriləcək Avropa çempionatının təsnifat turnirinə Bakı ev sahibliyi edəcək.

Azərbaycan Həndbol Federasiyasından YAZTV-ə bildiriblər ki, təsnifat turnirində millimiz ilə yanaşı, Böyük Britaniya, Kipr və Malta yığmaları da mübarizə aparacaqlar.

Millimiz ilk oyununu yanvarın 13-də Malta seçməsinə qarşı keçirəcək. Həndbolçularımız ertəsi gün Böyük Britaniya, ayın 15-də isə Kipr yığmaları ilə güclərini sınayacaqlar.

Prezident İlham Əliyev Gənclər və İdman Nazirliyinin strukturunun təkmilləşdirilməsi haqqında Sərəncam imzalayıb

Prezident İlham Əliyev Gənclər və İdman Nazirliyinin strukturunun təkmilləşdirilməsi haqqında Sərəncam imzalayıb

Sərəncama əsasən, Gənclər və İdman Nazirliyinin Bakı Şəhər Gənclər və İdman Baş İdarəsinin, Binəqədi, Qaradağ, Xəzər, Səbail, Sabunçu, Suraxanı, Nərimanov, Nəsimi, Nizami, Pirallahı, Xətai, Yasamal rayon gənclər və idman idarələrinin əsasında Bakı Şəhər Gənclər və İdman İdarəsi yaradılacaq.

Eyni zamanda, nazirliyin tərkibində yeni regional idarələr yaradılır:

Sumqayıt Şəhər Gənclər və İdman Baş İdarəsi, Abşeron, Xızı rayon gənclər və idman idarələrinin əsasında Abşeron−Xızı Regional Gənclər və İdman İdarəsi;

Ağsu, İsmayıllı, Qobustan və Şamaxı rayon gənclər və idman idarələrinin əsasında Dağlıq Şirvan Regional Gənclər və İdman İdarəsi;

Gəncə Şəhər Gənclər və İdman Baş İdarəsi, Naftalan şəhər, Daşkəsən, Göygöl, Goranboy və Samux rayon gənclər və idman idarələrinin əsasında Gəncə−Daşkəsən Regional Gənclər və İdman İdarəsi;

Xankəndi şəhər, Ağcabədi, Ağdam, Bərdə, Füzuli, Xocalı, Xocavənd, Şuşa və Tərtər rayon gənclər və idman idarələrinin əsasında Qarabağ Regional Gənclər və İdman İdarəsi;

Ağstafa, Qazax, Gədəbəy, Şəmkir və Tovuz rayon gənclər və idman idarələrinin əsasında Qazax−Tovuz Regional Gənclər və İdman İdarəsi;

Xaçmaz, Quba, Qusar, Siyəzən və Şabran rayon gənclər və idman idarələrinin əsasında Quba−Xaçmaz Regional Gənclər və İdman İdarəsi;

Astara, Lerik, Lənkəran, Masallı, Yardımlı və Cəlilabad rayon gənclər və idman idarələrinin əsasında Lənkəran−Astara Regional Gənclər və İdman İdarəsi;

Mingəçevir şəhər, Ağdaş, Göyçay, Kürdəmir, Ucar, Yevlax və Zərdab rayon gənclər və idman idarələrinin əsasında Mərkəzi Aran Regional Gənclər və İdman İdarəsi;

Beyləqan, İmişli, Saatlı və Sabirabad rayon gənclər və idman idarələrinin əsasında Mil−Muğan Regional Gənclər və İdman İdarəsi;

Balakən, Zaqatala, Qax, Şəki, Oğuz və Qəbələ rayon gənclər və idman idarələrinin əsasında Şəki−Zaqatala Regional Gənclər və İdman İdarəsi;

Cəbrayıl, Kəlbəcər, Qubadlı, Laçın və Zəngilan rayon gənclər və idman idarələrinin əsasında Şərqi Zəngəzur Regional Gənclər və İdman İdarəsi;

Şirvan şəhər, Biləsuvar, Hacıqabul, Neftçala və Salyan rayon gənclər və idman idarələrinin əsasında Şirvan−Salyan Regional Gənclər və İdman İdarəsi.

Nazirlər Kabinetinə Gənclər və İdman Nazirliyinin Bakı Şəhər Gənclər və İdman İdarəsinin və regional idarələrinin fəaliyyətinin təşkili ilə bağlı zəruri maliyyə və maddi-texniki təminat məsələlərini həll etmək tapşırılıb.

Maliyyə Nazirliyi gənclər və idman sahəsinin 2023-cü il yanvarın 1-dən mərkəzləşdirilmiş maliyyələşməyə keçməsini təmin etməlidir.

Zabit Səmədovun Bakıda baş tutacaq  vida gecəsi üçün çəkiölçmə mərasimi keçirilib

Zabit Səmədovun Bakıda baş tutacaq vida gecəsi üçün çəkiölçmə mərasimi keçirilib

Azərbaycanın məşhur döyüşçüsü (K-1 növündə çıxış edən)Zabit Səmədovun Bakıda baş tutacaq vida gecəsi üçün çəkiölçmə mərasimi keçirilib.Yaztv saytı xəbər verir ki,mərasimdə idmançıların yarış öncə çəkiləri tərəzidə ölçülüb.Bundan sonra idmançılar "face-to-face" üz-uzə qəliblər.Gecənin əsas döyüşü "Mauqli" ləqəbli Zabit Səmədovla braziliyalı Antonio Silva arasında olacaq. Səmədov bu qarşılaşmanın qalibi olacağı halda, Beynəlxalq Karate və Kikboksinq İdmanı Assosiasiyasının (ISKA) kəmərini qazanacaq.Turnirda mübarizə aparan iştirakçıların siyahısı:

65 kq Nikita Kostermann (Niderland) – Kübra Aksoy (Türkiyə)

64,5 kq Nuri Kacar (Türkiyə) – Emil Xəlilov (Azərbaycan)

+100 kq Kirill Buler (Almaniya) – Buğra Ərdoğan (Türkiyə)

72,5 kq Kristian Baya (Niderland) – Seyfulla Xambaxadov (Rusiya)

4 nəfərlik təsnifat turniri. 72,5 kq Besmir Helşani (Almaniya) – Andrey Kedveş (Xorvatiya)

4 nəfərlik təsnifat turniri. 72,5 kq Dmitri Filonçik (Belarus) – Ruslan Nağıyev (Azərbaycan)

72,5 kq Alim Nəbiyev (Azərbaycan) – Andrey Ostrovyanu (Rumıniya)

+100 kq Zabit Səmədov (Azərbaycan) – Antonio Silva (Braziliya)

”Mix Fight Championship” liqası çərçivəsində keçirilən döyüşləri CBC TV 10 sentyabr Milli Gimnastika Arenasından Bakı vaxtı ilə saat 21:00-dan etibarən canlı yayımlanacaq.