“SOCAR Türkiyə” şirkəti Hatay, Adıyaman, Qaziantep, Kahramanmaraş və Şanlıurfadakı Hazar yanacaqdoldurma məntəqələrindən bütün təcili yardım, yanğınsöndürmə, Fövqəladə Halların İdarə Olunması Agentliyinin (AFAD) və digər təşkilatların xilasetmə nəqliyyat vasitələrini pulsuz benzin və dizellə təmin edir.

Bu barədə YAZTV “SOCAR Türkiyə”yə istinadla xəbər verir. Şirkət zəlzələ bölgəsində yaşayan Azərbaycan vətəndaşlarının təxliyəsi çərçivəsində Azərbaycanın Ankaradakı səfirliyinə dəstək göstərir.

“SOCAR Türkiyə” AFAD-a 6,4 milyon lira məbləğində əsas tələbat malları təhvil verib, 3,5 milyon lira isə bağışlayıb, Miqrasiya İdarəsi Müdirliyinin göstərişi ilə bölgəyə çatdırılacaq 500 min lira dəyərində materialı təmin edib.

“Azəriqaz” İstehsalat Birliyində növbəti “Açıq qapı” aksiyası keçirilib.

İB-dən YAZTV-ə bildirilib ki, tədbirdə çıxış edən Bakı Regional Qaz İstismarı Departamentinin rəisi Rauf Əhmədov son bir ildə paytaxt və Abşeron rayonu üzrə abonentlərin sayında 42 min artımın qeydə alındığını qeyd edib.

Departament rəisi aksiya çərçivəsində qaz xətlərinə kənar, yəni, qanunsuz qoşulmalarda da artımın müşahidə olunduğunu deyib.

“Azəriqaz” İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev kənar qoşulmalarla bağlı abonentlərə müraciət edib. Şöbə rəisi, həmçinin fərdi evlərə və ya mənzillərə qaz xətlərinin çəkilməsi məsələsinə də toxunub.

Qeyd edib ki, “Azəriqaz” İstehsalat Birliyinin daxili resursları hesabına çəkilən küçə xətlərinə qoşulma prosesi sakinlərin vəsaiti hesabına, xüsusi lisenziyası olan podratçı şirkətlər tərəfindən həyata keçirilməlidir. Mənzillərin və ya fərdi evlərin qazlaşdırılması istisna hal kimi şəhid ailələrinə və qazilərə şamil edilir.

Bu il faiz dəhlizi parametrlərinə dair qərarlar yenilənmiş makroiqtisadi proqnozlar, xarici və daxili amillərin inflyasiyaya təsirləri, inflyasiya gözləntiləri və risk balansının dəyişimi nəzərə alınmaqla qəbul ediləcək.

YAZTV Mərkəzi Banka istinadla xəbər verir ki, əvvəlki illərdə olduğu kimi, 2023-cü ildə də faiz dəhlizinin Mərkəzi Bankın İdarə Heyətində öncədən ictimaiyyətə açıqlanmış qrafikə uyğun müzakirəsi nəzərdə tutulur. Faiz dəhlizi banklararası qısamüddətli pul bazarında vəsaitlərin yerləşdirilməsi və cəlb edilməsinin alternativ dəyəri kimi istifadə olunacaq.

Pul siyasətinin inflyasiyaya zaman intervalı ilə təsirini nəzərə alaraq, Mərkəzi Bank pul siyasətinə dair qərarları proqnoz inflyasiyanın hədəfdən ortamüddətli kənarlaşma səviyyəsindən asılı olaraq qəbul edəcək. Bu zaman faiz, kredit və gözlənti kimi transmissiya kanallarının təsir gücü nəzərə alınacaq. Pul siyasətinin əməliyyat hədəfi olaraq pul bazarında qısamüddətli faizlərin Mərkəzi Bankın faiz dəhlizinə yaxınlaşması üçün 2023-cü ildə Mərkəzi Bank bütün alətlərdən adekvat istifadə edəcək. Likvidliyin idarə edilməsində məcburi ehtiyatlardan, daimi imkan alətlərindən və açıq bazar əməliyyatlarından da istifadə olunacaq. Alətlərin kəmiyyət parametrlərinə və müddətinə dair qərarlar bank sisteminin likvidlik mövqeyindən asılı olaraq operativ şəkildə veriləcək.

Pul siyasətinin təkmilləşdirilməsi “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın Tədbirlər Planına uyğun olaraq “İnflyasiya hədəflənməsi rejiminə keçidin baza şərtlərinin formalaşdırılması” çərçivəsində həyata keçiriləcək. Ölkədə valyuta bazarında təklif kanallarının şaxələndirilməsi, maliyyə sektorunun dərinliyinin artırılması, nağd-kölgə iqtisadiyyatının məhdudlaşdırılması və makroiqtisadi koordinasiyanın effektivliyinin gücləndirilməsi inflyasiyanın hədəflənməsi rejiminə keçidə şərait yaradacaq. Yeni rejimə keçidin baza şərtlərinin formalaşdırılması istiqamətində Mərkəzi Bank tərəfindən pul siyasəti alətlərinin və pul bazarının infrastrukturunun təkmilləşdirilməsi davam etdiriləcək. Mərkəzi Bankın faiz dəhlizinin effektivliyinin artırılması, o cümlədən banklararası pul bazarında qısamüddətli faizlərin dəhlizin aşağı həddinə yaxın idarə olunması imkanlarına baxılacaq.

Mərkəzi Bankda təhlil və proqnozların hazırlanması üçün modellərin modernləşdirilməsi, proqnoz göstəricilərinin çeşidinin genişləndirilməsi xüsusi diqqətdə saxlanılacaq. Pul siyasətinin kommunikasiyasının əhatə dairəsinin genişləndirilməsini və aydın olmasını təmin etmək üçün daimi iş aparılacaq. Pul siyasətinin əməliyyat çərçivəsinin təkmilləşdirilməsi istiqamətində Mərkəzi Bank bank ictimaiyyəti, maliyyə bazarlarının peşəkar iştirakçıları və müstəqil ekspertlər ilə aktiv dialoqu davam etdirəcək. Yeni bank qanunvericiliyinin qəbul edilməsi Mərkəzi Bankın mandatının effektiv həyata keçirilməsinə zəruri dəstək verəcək.

Zəlzələ nəticəsində aviaşirkətin xidmətlərindən yararlana bilməyən AZAL-ın Türkiyəyə və geri gələn sərnişinlərinə aviabiletlərin dəyərinin cərimə tətbiq edilmədən tam qaytarılmasına və ya ödənişsiz yenidən bronlaşdırılmasına icazə verilir.

Bu barədə YAZTV-ə “Azərbaycan Hava Yolları” QSC-nin Mətbuat xidmətindən məlumat verilib.

Bildirilib ki, Türkiyənin Kahramanmaraş, Qaziantep, Şanlıurfa, Malatya, Diyarbəkir, Mardin, Batman, Ərzurum, Ərzincan, Sivas, Şırnak, Siirt, Van, Muş, Bingöl, Ağrı, Iğdır, Adana, Qars, Rizə, Trabzon, Giresun, Ordu, Samsun, Tokat, Merzifon, Kayseri, Adıyaman, Hatay, Elazığ, Nevşehir, Kastamonu və Sinop şəhərlərində baş vermiş zəlzələ səbəbindən Ankara, İstanbul, İzmir və Antalyanın beynəlxalq hava limanlarına reys yerinə yetirən AZAL və “Buta Airways”in fevralın 6-dək əldə edilmiş uçuş tarixi fevralın 6-dan 21-dək olan aviabiletlərinin, 31 mart 2023-cü il daxil olmaqla, “involuntary” proseduru çərçivəsində geri qaytarılması və istənilən digər tarixlərə yenidən bron edilməsi təmin olunur.

“Azərişıq” ASC elektrik enerjisi itkilərinin azaldılması istiqamətində yenilənmə işlərini davam etdirir. Bu yenilənmələr xüsusilə innovativ texnologiyalar əsasında həyata keçirilir. Bunlarla yanaşı, abonentlərlə mütəmadi olaraq maarifləndirici söhbətlər də aparılır.

ASC-dən YAZTV-ə bildirilib ki, görülən bütün tədbrilərə baxmayaraq, elektrik enerjisinin talanması hallarının qarşısını tam almaq mümkün olmayıb. Sayğaclara aylıq baxış zamanı həm əhali, həm də qeyri-əhali abonent qrupları arasında elektrik enerjisindən qanunsuz istifadəyə rast gəlinir. Belə hallardan biri Xırdalan şəhərində yerləşən “Mormor” restoranında ortaya çıxıb. Belə ki, sayğaca müdaxilə edilərək uzaqdan idarə olunan xüsusi qurğu quraşdırılıb. Qurğudan istifadə etməklə növbəti kənar müdaxilə Göyçay rayonunda avtoservis kimi fəaliyyət göstərən obyektlərdən birində aşkarlanıb. Məlum olub ki, abonent sayğacını xüsusi qurğu vasitəsilə dayandırıb. Suraxanıda ərzaq mağazasında da sayğac uzaqdan idarə olunan xüsusi qurğu ilə dayandırılıb. Üstəlik bu səbəbdən yanğın baş verib və sayğac tamamilə yararsız vəziyyətə düşüb. Xətai rayonunda fəaliyyət göstərən ət dükanına baxış keçirilən zaman da növbəti qanunsuzluq aşkarlanıb. Obyektə elektrik sayğacından kənar xətt daxil olduğu məlum olub.

Əhali abonentləri arasında da analoji hallara rast gəlinib. Astara rayonunda evlərin birində elektrik sayğacı xüsusi "maqnit" vasitəsilə dövrədən kənarlaşdırılıb. Eyni üsulla Sabirabad rayonunda, paytaxtda isə Görədil kəndində yerləşən evdə sayğaca kənar müdaxilə edilib. Digər neqativ hal Xətai rayonunda aşkarlanıb. Fərdi yaşayış evinin sayğacına baxış keçirilən zaman məlum olub ki, elektrik sayğacından kənar xətt daxil olur. Buzovna qəsəbəsində də evlərin birində sayğaca qanunsuz müdaxilə olduğu ortaya çıxıb. Sayğacın giriş-çıxış xətti eyni yuvaya birləşdirilərək dövrədən kənarlaşdırılıb.

“Azərişıq” ASC tərəfindən son illərdə istismara verilən sayğacların müasir və rəqəmsal olduğunu nəzərə alsaq, bütün müdaxilə hallarını sayğac öz yaddaş blokunda saxlayır. Laboratoriya şəraitində sayğaclara proqram əlavəsi tətbiq olunaraq həmin müdaxilə halları öz təsdiqini tapır. Qeyd edilən faktlarla bağlı qanunamüvafiq tədbirlər görülüb və bu ardıcıl olaraq davam etdiriləcək. Həmçinin bu cür qanunsuzluğa yol verən obyekt və müəssisələrin, şəxslərin adları kütləvi informasiya vasitələrində ictimaiyyətə təqdim olunacaq.

Beynəlxalq şirkətlərdən satış məqsədilə onlayn sifariş edən fiziki şəxslərin hansı vergi öhdəlikləri yaranır?

YAZTV Dövlət Vergi Xidmətinə istinadla xəbər verir ki, Vergi Məcəlləsinə əsasən, hüquqi şəxs yaratmadan sahibkarlıq fəaliyyətini həyata keçirən fiziki şəxs sahibkarlıq fəaliyyətinə başladığı günədək vergi uçotuna alınma ilə bağlı ərizəni vergi orqanına təqdim etməklə vergi uçotuna alınmalı (VÖEN əldə etməli) və əldə etdiyi gəlirdən vergini dövlət büdcəsinə ödəməlidir.

Uçota alınma “ASAN xidmət” mərkəzlərində, “ASAN xidmət” mərkəzlərinin olmadığı şəhər və rayonlarda isə vergiödəyicilərinə xidmət mərkəzlərində həyata keçirilir.

Fiziki şəxs tərəfindən sadələşdirilmiş vergitutma sistemi seçildiyi halda ticarət fəaliyyətindən əldə edilən gəlirlərdən (ümumi hasilatdan) xərclər çıxılmadan 2 faiz dərəcə ilə sadələşdirilmiş vergi hesablanıb dövlət büdcəsinə ödənilir.

Qeyd olunan fəaliyyət gəlir vergisinin ödəyicisi kimi həyata keçirildiyi halda, əldə edilmiş gəlirdən həmin gəlirin əldə edilməsi ilə bağlı çəkilən xərclər çıxıldıqdan sonra qalan məbləğdən 20 faiz dərəcə ilə gəlir vergisi hesablanıb dövlət büdcəsinə ödənilir.

Həmçinin nəzərə alınmalıdır ki, Vergi Məcəlləsi ilə müəyyən olunmuş qaydada gəlirlərin və xərclərin uçotunu aparan mikro sahibkarlıq subyekti olan fərdi sahibkarların sahibkarlıq fəaliyyətindən gəlirinin 75 faizi gəlir vergisindən azaddır. Mikro sahibkarlıq subyekti olduğu halda (işçilərinin orta siyahı sayı 1-10 nəfər aralığında olan və illik gəliri 200 min manatdan yuxarı olmayan şəxslər) gəlirlərin və xərclərin uçotunu aparmaqla 75 faiz vergi güzəşti əldə edə bilər.

Gələn həftə daha bir şəhərdə və üç rayonda “Azəriqaz” İB-nin “Açıq mikrofon” aksiyaları keçiriləcək.

YAZTV xəbər verir ki, aksiya fevralın 6-da saat 11:00-dan 12:00-dək Zərdab rayonunda (Heydər Əliyev Parkı), ertəsi gün saat 11:00-dan 12:00-dək Tərtər rayonunda (Mədəniyyət Mərkəzinin qarşısı) keçiriləcək. Fevralın 8-də saat 13:00-dan 14:00-dək Yevlax şəhərində (Heydər Əliyev Mərkəzinin qarşısı), iki gün sonra saat 11:00-dan 12:00-dək Ağcabədi rayonunda (Qarabağ Muğam Evinin qarşısı) vətəndaşların müraciətləri dinləniləcək.

Vətəndaşlar həmin ünvanlara yaxınlaşaraq “Açıq mikrofon” aksiyasının imkanlarından maksimum istifadə edərək, problem və təkliflərini rahat şəkildə ifadə edə bilərlər.

Yanvarın 26-da “Bakı Hərrac Mərkəzi”ndə Əmanətlərin Sığortalanması Fondunun ləğvetməsində olan “Atabank” ASC-nin balansındakı daşınmaz əmlak açıq hərraca çıxarılacaq.

Fonddan YAZTV-ə bildirilib ki, daşınmaz əmlak Lənkəran şəhəri, Həzi Aslanov xiyabanında 0,0218 hektar torpaq sahəsində yerləşən 2 girişli, 301 kvadratmetr ümumi, 239,7 kvadratmetr əsas, 61,3 kvadratmetr köməkçi sahədən ibarət 2 mərtəbəli (ofis) qeyri-yaşayış binasıdır. Daşınmaz əmlakın ilkin satış qiyməti 600 min manatdır. Satış qiymətinin 5 faizi həcmində beh hərrac təşkilatına ödənilməlidir. Alış qiyməti 7 təqvim günü ərzində sifarişçinin hesabına ödənilməlidir.

Azərbaycan neftinin qiyməti ucuzlaşıb.

YAZTV xəbər verir ki, “Azeri Light” markalı neftin bir barelinin qiyməti 9 sent azalaraq 87,99 dollar olub.

Xatırladaq ki, Azərbaycan neftinin bir barelinin ötən il ərzində maksimum qiyməti martın 9-da (135,99) qeydə alınmışdı.

"Azərbaycan Hava Yolları" QSC – AZAL Avropanın məşhur istiqamətinə - Barselonaya reysləri bərpa edir.

Bu barədə QSC-nin fesybukdakı rəsmi hesabında məlumat verilir. ⠀

“Ən böyük turizm şəhərlərindən birinə ilk uçuşumuz mayın 2-nə planlaşdırılıb. Barselonaya uçuşlar həftədə iki dəfə, çərşənbə axşamı və bazar günü həyata keçiriləcək. Biletlər artıq www.azal.az  saytında və mobil tətbiqində mövcuddur”, - deyə paylaşımda bildirilir.

31 Dekabr – Dünya Azərbaycanlılarının Həmrəyliyi Günü və Yeni il münasibətilə gücləndirilmiş iş rejimində çalışan Bakı Metropoliteni beş gün ərzində 2 milyon 332 min 539 və yaxud gün ərzində orta statistik hesabla 466 min 508 sərnişin daşıyıb. Bayram günlərində hər hansı neqativ hadisə yaşanmayıb.

YAZTV xəbər verir ki, Bu barədə AZƏRTAC-ın sorğusuna cavab olaraq “Bakı Metropoliteni” QSC-dən bildirilib.

Qeyd edilib ki, bu ilin yanvarın 1-nə keçən gecə Yeni ilin gəlişini şəhər gəzintisində qeyd edənlərin axını nəzərə alınaraq, Bakı Metropoliteninin sərnişindaşıma fəaliyyəti 1 saat uzadılıb. Lakin tələbata uyğun olaraq, “Bakı Metropoliteni” QSC-nin rəhbərliyi iş vaxtını daha bir saat artırıb. Gecə saat 02:00-a qədər stansiyalar sərnişinlərin girişinə açıq olub. İki saat ərzində metropolitendən 27 min 688 ödənişli sərnişin istifadə edib. Bu rəqəm 2022-ci ilin gəlişi ilə əlaqədar uzadılmış iş vaxtı ərzində (2022-ci il yanvarın 1-nə keçən gecə) daşınan sərnişin sayından 5156 nəfər çoxdur.

2023-cü il yanvarın 1-nə keçən gecə 2 saat ərzində sərnişinlərin ən çox daxil olduğu stansiyalar “28 May” (9363), “Sahil” (8627) və “İçərişəhər” (5225) olub. Bu, iş vaxtının uzadıldığı müddətdə metropolitendən istifadə edən sərnişinlərin 83,84 faizini təşkil edir. Ümumiyyətlə, 2022-ci ilin dekabr ayı ərzində Bakı Metropoliteni 21 milyon 293 min 624 sərnişinə daşıma xidməti göstərib. Orta statistik hesabla gün ərzində 686 min 891 nəfər metropolitendən istifadə edib. Bu, pandemiya dövründə bir ay ərzində ən yüksək göstərici hesab olunur. İlin sonuncu ayının yalnız iş günləri nəzərə alınarsa, metropoliten 22 gün ərzində orta hesabla 760 min 185 nəfər sərnişin daşıyıb.

Qafqaz regionunun ən böyük metallurgiya şirkəti olan “Baku Steel Company” QSC-nin (BSC) ilk rəsmi pərakəndə satış mərkəzi Bakı şəhəri, N.Nərimanov rayonu, Mir Cəlal küçəsi, 15 (Dərnəgül) ünvanında istifadəyə verilib. Yeni mərkəzin açılışı ilə “Baku Steel Company” QSC Azərbaycanın pərakəndə satış bazarında da rəsmən təmsil olunacaq.

Pərakəndə satış mərkəzi həftənin 6 günü – çərşənbə axşamından bazar gününədək, saat 08:00-17:00 aralığında fəaliyyət göstərəcək.

Texniki təhlükəsizlik qaydalarına tam riayət olunan yeni satış mərkəzində müştərilər “Baku Steel Company” QSC-nin istehsalı olan yüksək keyfiyyətli armatur çeşidlərini müxtəlif diametr və uzunluqda, istənilən sayda və ya çəkidə əldə edə biləcəklər. Mərkəzdə, həmçinin katanka (məftil), xomut, dairəvi çubuqlar, tikişsiz borular, kvadrat və dairəvi pəstahlar və yayma valları kimi məhsulları da almaq olacaq. Məhsullar və onların qiymətləri ilə maraqlananlar This email address is being protected from spambots. You need JavaScript enabled to view it. elektron poçt ünvanına yazmaqla və ya +994 12 4 900 800, +994 51 4 900 800 telefon nömrələrinə zəng etməklə məlumat əldə edə bilərlər.

Qeyd edək ki, bu günədək “Baku Steel Company” QSC-nin məhsullarının satışı şirkət tərəfindən əsasən topdan və korporativ satış üsulu ilə həyata keçirilib.

Xatırladaq ki, “Baku Steel Company” QSC-də hazırda yüksək keyfiyyətdə armatur, katanka (məftil), kvadrat və dairəvi pəstahlar, tikişsiz borular, habelə çeşidli fasonlu tökmələr istehsal edilir. 20 ildən artıq fəaliyyəti dövründə nəinki Azərbaycanın, bütün Qafqaz regionunun tanınmış brendinə çevrilən “Baku Steel Company” QSC-nin məhsulları yerli bazarda böyük tələbatla satılmaqla yanaşı, Avropa, Amerika və Asiyanın, ümumilikdə 20-dən çox ölkəsinə ixrac olunub.