Friday, 28 Yanvar 2022 19:57
Yeni Azərbaycan Televiziyası
Bakı
İstanbul
Moskva
"Azdrama"nın aktyorları koronavirusa yoluxub, teatr bağlanıb

"Azdrama"nın aktyorları koronavirusa yoluxub, teatr bağlanıb

Azərbaycan Dövlət Akademik Milli Dram Teatrı (Azdrama) koronavirusa görə fəaliyyətini müvəqqəti dayandırıb.

Bu barədə YAZTV-yə teatrdan məlumat verilib.

Bildirilib ki, son günlər teatrın əməkdaşları arasında COVID-19 infeksiyasına yoluxma hallarının artması ilə əlaqədar qabaqlayıcı-profilaktik tədbirlərin görülməsi qərara alınıb: "Belə ki, yanvar ayının 23-dən fevral ayının 7-dək teatrın öz iş fəaliyyətini müvəqqəti olaraq dayandırması haqqında qərar qəbul olunub. Qeyd olunan tarixlərə təyin edilmiş tamaşa nümayişləri və məşqlər təxirə salınır, teatrın inzibati binasına giriş-çıxış fevralın 7-dək məhdudlaşdırılır. Həmin tarixlərdə nəzərdə tutulan tamaşalar fevralın 7-dən etibarən nümayiş olunacaq".

Hacı Zeynalabdin Tağıyevlə bağlı serial çəkiləcək

Hacı Zeynalabdin Tağıyevlə bağlı serial çəkiləcək

"Hacı Zeynalabdin Tağıyevlə bağlı serial çəkiləcək".

YAZTV  xəbər verir ki, bunu mədəniyyət naziri Anar Kərimov “Mədəniyyət Nazirliyi: 2021-ci il üzrə Hədəflər və Nəticələr” mövzusunda keçirilən mətbuat konfransında deyib.

O bildirib ki, serial Mədəniyyət Nazirliyi Bakı Media Mərkəzi ilə birgə çəkiləcək.

Teatrşünas-tənqidçi Anar Burcəliyevin  yeni kitabı nəşr olunub

Teatrşünas-tənqidçi Anar Burcəliyevin yeni kitabı nəşr olunub

 Tanınmış teatrşünas-tənqidçi Anar Burcəliyevin “44 günlük Zəfər tarixinin Gəncə şəhidləri” adlı yeni kitabı nəşr olunub. Kitab 2020-ci ilin sentyabr ayının 27-dən başlayan, 44 gün davam edən və Dağlıq Qarabağ da daxil olmaqla işğal altındakı ərazilərimizin qaytarılması ilə nəticələnən Vətən Müharibəsi tariximizin ən parlaq səhifəsinə, Azərbaycan xalqının iftixar və qürur mənbəyinə çevrilən Vətən oğullarımızın, Gəncə şəhidlərinin əziz xatirəsinə həsr olunub. 

Xatırladaq ki, xronoloji ardıcıllıqla ensklopedik məlumat xarakterli kitab “AzPrint” mətbəəsində nəfis tərtibatda Gəncə şəhər İcra Hakimiyyətinin dəstəyi ilə nəşr edilib. Kitabın redaktorları Gülər Bayram və Sailə Məhərrəmqızıdır.

Gəncədə “Şəhidlikdən qələbəyə gedən yol” adlı kitabın təqdimatı olub

Gəncədə “Şəhidlikdən qələbəyə gedən yol” adlı kitabın təqdimatı olub

Gəncə Uşaq Evində Əməkdar müəllim Səmayə Mirzəyevanın qələmə aldığı “Şəhidlikdən qələbəyə gedən yol” adlı kitabın təqdimatı keçirilib. Təqdimatda Gəncə Şəhər İcra Hakimiyyətinin başçısı Niyazi Bayramov, Gəncə Uşaq Evinin direktoru Nazilə İsmayılova, şəhid ailələri, ictimaiyyət nümayəndələri və Uşaq Evinin kiçik sakinləri iştirak ediblər.

Əvvəlcə Azərbaycanın Dövlət Himni səsləndirilib. Sonra Vətənimizin bütövlüyü uğrunda gedən döyüşlərdə qəhrəmancasına şəhid olanların xatirəsi bir dəqiqəlik sükutla yad edilib.

Niyazi Bayramov tədbir iştirakçılarını salamlayaraq bildirib ki, 30 il müddətində işğal altında qalan torpaqlarımız cəmi 44 gün ərzində Müzəffər Ali Baş Komandan cənab İlham Əliyevin rəhbərliyi və Rəşadətli Ordumuzun gücü ilə azad edildi və qələbəmiz tarixə qızıl hərflərlə yazıldı.

“Əlbəttə, istər Birinci Qarabağ müharibəsində, istərsə də Zəfərlə yekunlaşan Vətən müharibəsində bizim şəhidlərimiz və qazilərimizin rolu danılmazdır. Məhz onların şücaətləri nəticəsində bu gün öz əzəli torpaqlarımıza qovuşmuşuq. Səmayə xanımın qələmə aldığı “Şəhidlikdən qələbəyə gedən yol” adlı kitabda da şəhidlikləri ilə dastana çevrilən qəhrəmanlarımız haqqında geniş bəhs olunub. Bunun üçün hörmətli yazıçıya təşəkkür edir və uğurlar arzulayıram. Sonda bütün şəhidlərimizə Allahdan rəhmət, qazilərimizə isə can sağlığı diləyirəm”,-deyə Niyazi Bayramov əlavə edib.

Nazilə İsmayılova çıxışında “Şəhidlikdən qələbəyə gedən yol” adlı kitabın əhəmiyyətindən bəhs edib. Nazilə xanım qeyd edib ki, Birinci Qarabağ müharibəsində şəhidlər verməklə torpaq uğrunda döyüşkənlik ruhumuzu  dünyaya göstərdik. Vətən müharibəsində isə Qələbə qazanmaqla, bütün dünyaya gücümüzü sübut etdik. Nazilə İsmayılova hər iki müharibə zamanı həlak olan şəhidlərimizin xatirəsini əbədi olaraq uca tutulacağını vurğulayıb.

Tədbirdə Milli Qəhrəman, şəhid Polad Həşimovun ömür-gün yoldaşı Ofelya Salmanova ilə videoformat vasitəsilə əlaqə saxlanılıb. Ofelya xanım Polad Həşimovla bağlı xatirələrini bölüşüb və  kitabın ərsəyə gəlməsində müəllifə öz dərin təşəkkürünü ifadə edib.

Müəllif Səmayə Mirzəyevə qələmə aldığı kitab haqqında tədbir iştirakçılarına ətraflı məlumat verib. O qeyd edib ki, kitabda Birinci Qarabağ müharibəsi və Vətən Müharibəsi zamanı şəhid olan igidlərimizin  qəhrəmanlarıqları barədə geniş bəhs olunub. Səmayə xanım kitabın ərsəyə gəlməsində əməyi keçən hər kəsə minnətdarlığını bildirib. 

Tədbirdə Gəncə Uşaq Evinin sakinləri tərəfindən şəhidlərə həsr olunan səhnəciklər və şeirlər nümyiş olunub.

Sonda “Şəhidlikdən qələbəyə gedən yol” adlı kitabı tədbir iştirakçılarına təqdim olunub.

Qeyd edək ki, kitabın müəllifi, Əməkdar müəllim Səmayə Mirzəyevə uzun illər Gəncə Uşaq Evində könüllü olaraq müəllimlik edib, hazırda yaş həddi ilə əlaqədar olaraq təqaüddədir.

Əməkdar jurnalist dünyasını dəyişdi

Əməkdar jurnalist dünyasını dəyişdi

Əməkdar jurnalist, yazıçı-publisist Əhməd İsayev 81 yaşında dünyasını dəyişib. 

YAZTV xəbər verir ki, o, ötən gün Bakıda vəfat edib.

Ə.İsayevin ölümünə səbəb xroniki ürək çatışmazlığı olub.

Qeyd edək ki, Ə.İsayev Azərbaycan Jurnalistlər İttifaqının, Azərbaycan Yazıçılar Birliyinin üzvü olub. “Qızıl qələm”, “Ustad” ali jurnalistika, “Həsən bəy Zərdabi” və “Araz” ali ədəbi mükafatlar laureatı olub. 2006-cı ildə Prezidentin fərdi təqaüdünə layiq görülüb.

Nazir: "Ermənistanın Azərbaycanın sülh təşəbbüsünə qoşulmasını gözləyirik"

Nazir: "Ermənistanın Azərbaycanın sülh təşəbbüsünə qoşulmasını gözləyirik"

"Biz Ermənistandan Azərbaycanın sülh təşəbbüslərinə müsbət cavab gözləyirik”.

YAZTV xəbər verir ki, bunu mədəniyyət naziri Anar Kərimov jurnalistlərə açıqlamasında deyib.

"Çağırışlarımızın müsbət qarşılanmasını, dayanıqlı sülhün və etimad mühitinin yaradılmasında Ermənistan tərəfinin də iştirakını istərdik. Nəticə etibarilə bu bölgədə sülh təmin ediləcək. Sülh təmin olunarsa, davamlı inkişaf da təmin olunacaq", - nazir vurğulayıb.

Novruz Qartal vəfat etdi

Novruz Qartal vəfat etdi

Əməkdar artist Novruz Qartal bu gün vəfat edib.

YAZTV xəbər verir ki, bu barədə aktyor Əjdər Dadaşov məlumat paylaşıb.

Xatırladaq ki, aktyor bir müddət öncə bağırsaq xərçəngi xəstəliyi səbəbindən Milli Onkologiya Mərkəzinə yerləşdirilərək əməliyyat olunmuşdu.

Qeyd edək ki, Novruz Qartal 1947-ci ildə anadan olub. O, 1967-ci ildən Azərbaycan Dövlət Musiqili Komediya Teatrında çalışıb.

Çalışdığı illərdə Novruz Əliyev özünü epizodik və əsas rolların bacarıqlı ifaçısı kimi göstərib, buna görə tamaşaçıların dərin rəğbətini qazanıb.

2013-cü ildə Azərbaycanın əməkdar artisti fəxri adına layiq görülüb. O, bir neçə dəfə Prezident mükafatına layiq görülüb.

Allah rəhmət eləsin!

Nazir: "Zəfər muzeylərinin yaradılması ilə bağlı işlər davam etdirilir"

Nazir: "Zəfər muzeylərinin yaradılması ilə bağlı işlər davam etdirilir"

"Həm Bakıda, həm də işğaldan azad edilən ərazilərdə Zəfər muzeyləri yaradılır və bununla bağlı işlər davam etdirilir".

Bunu YAZTV-yə açıqlamasında mədəniyyət naziri Anar Kərimov deyib.

Onun sözlərinə görə, məsələ ilə bağlı həm yerli, həm də xarici ekspertlər cəlb edilib: "Muzeyin həm konsepsiyası və içindəki məzmunu ilə bağlı işlərə kompleks şəkildə baxırıq. Bunların hamısının həlli üçün işlər aparılır".

Anar Burcəliyev "Simurq 2021" mükafatına layiq görülüb

Anar Burcəliyev "Simurq 2021" mükafatına layiq görülüb

Tanınmış teatrşünas-tənqidçi Anar Burcəliyev 2021-ci ilin yekunları və əldə olunan nailiyyətlərə görə "Simurq 2021" mükafatına layiq görülüb.

Ödül "Simurq 2021" qala gecəsinin mükafatlandırılma mərasimində təqdim olunub.

Qeyd edək ki, təqdimat mərasimi "Bey Design" Group, Beynəlxalq Muğam Mərkəzi, Fortuna Media Group, "101.az" İnteraktiv Media Agentliyi və bir sıra digər informasiya, xəbər agentliklərinin təşkilati dəstəyi ilə Beynəlxalq Muğam Mərkəzində reallaşıb.

 

 

Mədəniyyət Nazirliyinin Aparat rəhbəri işdən çıxıb

Mədəniyyət Nazirliyinin Aparat rəhbəri işdən çıxıb

Mədəniyyət Nazirliyinin Aparat rəhbəri Vasif Eyvazzadə işdən çıxıb.

YAZTV xəbər verir ki, o, bu barədə feysbuk səhifəsində məlumat paylaşıb.

V.Eyvazzadə fəaliyyətini digər istiqamətlərdə fərqli statusda davam etdirəcəyini açıqlayıb: "Azərbaycan Yaradıcı Sənayelər Federasiyasının rəhbəri olaraq komandamızla birlikdə ölkəmizdə yaradıcılıq, innovasiya və texnologiyaların uzlaşdığı bir sahənin-yaradıcı sənayelərin real inkişafına, həmçinin ölkəmizin yumşaq güc siyasətinin beynəlxalq müstəvidə həyata keçməsinə müxtəlif platformalar vasitəsilə dəstək olmağa davam edəcəyik".

Qeyd edək ki, o bu vəzifəyə 2020-ci ilin avqustunda təyin edilmişdi.

Mədəniyyət Nazirliyi Ağalı kəndi ilə bağlı təkliflər verib

Mədəniyyət Nazirliyi Ağalı kəndi ilə bağlı təkliflər verib

Ağalı kəndində dövlətimiz tərəfindən aidiyyəti sosial və mədəni infrastruktur yaradılır.

Bu barədə YAZTV-yə Mədəniyyət Nazirliyindən məlumat verilib.

Bildirilib ki, bununla bağlı müvafiq təkliflər verilib.

 

"Ağalı kəndini Kənd Təsərrüfatı Nazirliyi aidiyyəti qurumlarla birgə inşa edir. Kənddə bütün sosial infrastruktur layihələrinin həyata keçirilməsi nəzərdə tutulub. Ağalı kəndində dövlətimiz tərəfindən aidiyyəti sosial və mədəni infrastruktur yaradılır. Qeyd Ağıllı kəndinin tikintisi ilə bağlı məsələlər aidiyyəti qurumlar tərəfindən həyata keçirilir. Mədəniyyət Nazirliyi müvafiq təkliflərini təqdim edib", - deyə məlumatda qeyd olunub.

Qeyd edək ki, Zəngilan rayonunun Ağalı kəndində “Ağıllı kənd” layihəsi çərçivəsində tikinti-quruculuq işləri davam edir. "Ağıllı kənd" pilot layihəsi Zəngilanın 1-ci, 2-ci, 3-cü Ağalı kəndlərini əhatə edir. Layihənin icrası, əsasən, 5 komponent üzrə aparılır. Onlar yaşayış, istehsal, sosial xidmətlər, "ağıllı kənd təsərrüfatı" və alternativ enerji sahələridir. Ərazidə ilk olaraq tam izolyasiya olunmuş və innovativ tikinti materiallarından istifadə olunmaqla 200 fərdi evin tikintisi nəzərdə tutulub.

Mədəniyyət Nazirliyi beynəlxalq film festivalı ilə bağlı qalmaqala münasibət bildirib

Mədəniyyət Nazirliyi beynəlxalq film festivalı ilə bağlı qalmaqala münasibət bildirib

Mədəniyyət Nazirliyi və “Cinema” Gənc Kinematoqrafçılar Mərkəzi XII Bakı Beynəlxalq Qısa Filmlər Festivalı ilə bağlı qalmaqala aydınlıq gətirib.

Nazirlikdən  bildirilib ki, bununla bağlı məsələlərə müdaxilə etməyiblər.

Qeyd olunub ki, festivalın təşkilatçısı “Cinema” Gənc Kinematoqrafçılar Mərkəzidir: "Nazirlik Azərbaycanın ən yaxşı filmlərinin seçilməsi üçün keçirilən beynəlxalq tədbirə müəyyən maliyyə dəstəyi göstərib. Festivalın Mədəniyyət Nazirliyi tərəfindən dəstəklənən hissəsinin büdcəsində mükafat fondu üçün hər hansı bir məbləğ nəzərdə tutulmayıb. Mükafatçılar üçün nəzərdə tutulan vəsaitlə bağlı sorğu festivalın təşkilatçısına ünvanlanmalıdır. İki nominasiyada heç bir filmə mükafatın verilməməsi münsfilər heyətinin qərarıdır. Nə Mədəniyyət Nazirliyinin, nə də təşkilat komitəsinin münsiflər heyətinin rəyinə müdaxilə etməsi mümkün deyil".

“Cinema” Gənc Kinematoqrafçılar Mərkəzindən isə vurğulanıb ki, festivalın əsas dəstəkçisi Mədəniyyət Nazirliyi olub: "Ancaq tədbir daxilində hələ bir neçə ay öncədən elan olunan mükafat fondunun yaradılması ideyası isə festival komandasına, birbaşa olaraq "Cinema" Gənc Kinematoqrafçılar Mərkəzinə məxsusdur. Festivalın “Ən yaxşı bədii film”, “Ən yaxşı sənədli film”, “Ən yaxşı animasiya filmi”, “Ən yaxşı sosial çarx” nominasiyasının qalibinə pul mükafatları da məhz mərkəzin - festivalın təşkilat komandasının hesabına ödəniləcək. “Cinema” Gənc Kinematoqrafçılar Mərkəzi ilə Mədəniyyət Nazirliyi arasında mükafat fondu ilə bağlı heç bir müqavilə və razılaşma olmayıb. Bu təşəbbüs bizim yerli gənc rejissorlar üçün nəzərdə tutduğumuz bir stimul formasıdır".

"Bu il münsiflər heyətinin qərarına əsasən, “Ən yaxşı sənədli film”, “Ən yaxşı sosial çarx” nominasiyaları üzrə qaliblər müəyyənləşdi və onlara ayrı-ayrılıqda pul mükafatı veriləcək. Münsiflər heyətinin qərarına əsasən, digər iki nominasiyaya (“Ən yaxşı bədii film”, “Ən yaxşı animasiya filmi”) heç bir film layiq görülmədi. Bu, çox normal haldır. Buna həm də dünya festivalları təcrübəsində rast gələ bilərsiniz. Festivalda iki müsabiqə bölməsi mövcuddur: beynəlxalq və yerli. Festivalın qaydalarına görə, münsiflər heyəti onlara həvalə olunan yarışma proqramındakı filmlərə baxıb dəyərləndirməlidir. Sözügedən mərhələdə seçim məhz münsiflər heyətinindir, festivalın təşkilat komitəsi bu qərara müdaxilə edə bilməz. Təəssüf ki, bizim təklif etdiyimiz pul mükafatına 4 nominasiyadan yalnız ikisi layiq görüldü və təşkilat komitəsi olaraq münsiflər heyətinin bu seçimini normal qarşılayırıq. Eyni zamanda festival komandasının öz təşəbbüsü ilə elan olunan mükafat fondunun hansı qurum tərəfindən təsis olunmasını dəqiqləşdirmədən yerdə qalan vəsaitin mənimsənilməsi haqqında müxtəlif fikirlər irəli sürüldü. Bir daha bildirmək istəyirik ki, mükafat fondu ilə bağlı təşəbbüs festivalın özünə aiddir və məqsədimiz məhz yerli gənc müəlliflərə stimul verməkdir", - Mərkəzdən deyilib.

Qeyd edək ki, noyabrın 23-də Nizami Kino Mərkəzində XII Bakı Beynəlxalq Qısa Filmlər Festivalı keçirilib. Tədbirdən bir həftəyə yaxın müddət keçməsinə baxmayaraq, müsabiqə ətrafında qalmaqal səngimir. Belə ki, bu il mükafat fondu 5 000 AZN olan yerli müsabiqədə “Ən yaxşı bədii film”, “Ən yaxşı sənədli film”, “Ən yaxşı animasiya filmi”, “Ən yaxşı sosial çarx” nominasiyaları üzrə qaliblər seçilməli idi. Lakin “Ən yaxşı bədii film” və “Ən yaxşı animasiya filmi” nominasiyaları üzrə qaliblər müəyyənləşməyib. Bu da müsabiqəyə film təqdim edən gənc rejissorlar arasında nazarılıqlara səbəb olub.

Xatırladaq ki, bu il festivala 72 ölkədən 3 217 qısa film göndərilib. Bunlardan 82 film yerli müsabiqəyə təqdim edilib. Festivalda yerli müsabiqədə “Ən yaxşı sənədli film” nominasiyasının qalibi “Papanin” filminin rejissoru Türkan Hüseynova, “Ən yaxşı sosial çarx” nominasiyasında “Korona incəsənətə yardım” sosial çarxının müəllifi Cavid Səmədov olub.