Azərbaycan Respublikasının Prezidenti İlham Əliyevin müvafiq Sərəncamı ilə 2023-cü ilin “Heydər Əliyev İli” elan edilməsi ilə bağlı Gəncə şəhərində “Təmiz şəhər” aksiyası həyata keçirilir.

Gəncə Şəhər İcra Hakimiyyətinin başçısı Niyazi Bayramovun tapşırığına əsasən, aksiya çərçivəsində Gəncə şəhərinin müxtəlif ərazilərində təmizlik və abadlıq işləri görülür. Mart ayı ərzində Gəncə şəhər Mənzil Kommunal Təsərrüfatı İstehsalat Birliyinin müvafiq şöbələri tərəfindən şəhərimizin park və xiyabanlarında, küçə və prospektlərində, həmçinin Gəncəçay çayının məcrasında iməcliklər təşkil olunub, abadlıq, təmir-bərpa işləri həyata keçirilib, yaşıllıq zolaqlarına qulluq göstərilib, yeni ağaclar və gül kolları əkilib. Park və xiyabanlarda olan və təmirə ehtiyac duyan oturacaqlar bərpa edilib.

Yaşıllıq zolaqlarına xüsusi aqrotexniki qulluq göstərilərək, yerli iqlimə uyğun yeni ağaclar və dekorativ kollar əkilib, güllərdən ibarət kompozisiyalar yaradılıb.

Bununla yanaşı, MKTİB-nin Təmir-tikinti və Qəza xidməti şöbəsi tərəfindən şəhərin bir sıra küçələrində olan işıq dayaqları, körpülərin dəmir məhəccərləri və kiçik tutumlu zibil qutuları yuyularaq təmizlənib. İşlər MKTİB-in xüsusi texnikaları vasitəsi ilə həyata keçirilib.

Aparılan genişmiqyaslı təmizlik işləri Gəncəçay çayının məcrası boyu davam etdirilib. Çayın məcrası məişət tullantılarından, ağac budaqlarından, kol-kos və alaq otlarından təmizlənib.

Qeyd edək ki, Gəncə Şəhər İcra Hakimiyyətinin başçısı Niyazi Bayramov “Təmiz şəhər” aksiyası çərçivəsində görülən işləri daim diqqətdə saxlayır. Şəhər rəhbəri iməcliklərin keçirildiyi ərazilərə baş çəkərək, görülən işlərlə yerində tanış olur, öz tapşırıq və tövsiyələrini verir.

Görülən işlər Gəncə şəhər sakinləri tərəfindən də müsbət qarşılanır.

Qeyd edək ki, “Təmiz şəhər” aksiyası çərçivəsində həyata keçirilən tədbirlər bundan sonra da davam etdiriləcək.

Ötən gün axşam saatlarında Milli Məclisin deputatı Fazil Mustafa paytaxtın Sabunçu rayonunda yaşadığı evin qarşısında odlu silahdan açılmış atəş nəticəsində xəsarət alıb. Faktla bağlı hüquq - mühafizə orqanları tərəfindən cinayət işi açılıb.

Bu barədə Milli Məclisdən bildirilib.

TƏBİB-dən verilən məlumata görə, Fazil Mustafaya sağ çiynin, sağ budun yuxarı üçdə birinin güllə yarası diaqnozu ilə hazırda zəruri tibbi xidmətlərin göstərilməsi davam edir. Onun vəziyyəti stabil olaraq qiymətləndirilir və həyati təhlükəsinin olmadığı bildirilir.

Qeyd edək ki, hazırda BMT Baş Assambleyasında keçiriləcək yüksək səviyyəli iclasda iştirak etmək məqsədilə Amerika Birləşmiş Ştatlarının Nyu-York şəhərində işgüzar səfərdə olan Milli Məclisin sədri Sahibə Qafarova hadisə ilə bağlı məlumat aldıqdan sonra Fazil Mustafanın ailəsi ilə əlaqə saxlamış, onun vəziyyəti ilə maraqlanmışdır.

Şəmkirdə yeraltı təkan qeydə alınıb.

AMEA nəzdində Respublika Seysmoloji Xidmət Mərkəzindən YazTV-ə bildirilib ki, zəlzələ yerli vaxtla saat 12:27-də Gədəbəy stansiyasından 37 km şimal-şərqdə, Şəmkir rayonunda baş verib.

Zəlzələ hiss olunmayıb. Zəlzələnin maqnitudası 4 bal, dərinliyi 9 kilometr olub.

Ekologiya və Təbii Sərvətlər Nazirliyinin verdiyi məlumata əsasən, martın 30-dan başlayaraq iki gün ərzində ölkə ərazisində hava şəraitinin güclü külək və yağışla müşahidə olunan kəskin dəyişməsi gözlənilir.

YAZTV xəbər verir ki, Daxili İşlər Nazirliyinin Baş Dövlət Yol Polisi İdarəsi verilən xəbərdarlıqla əlaqədar yollarda yarana biləcək yol qəzaları və digər xoşagəlməz halların qarşısının alınması üçün hərəkət iştirakçılarına müraciət edərək, onlardan yola çıxarkən ehtiyatlı olmağı, yol hərəkəti qaydalarına ciddi riayət etməyi, digər hərəkət iştirakçılarına, xüsusilə piyadalara qarşı diqqətli davranmağı xahiş edir.

Qoşqulu, tentli, uzun ölçülü yük avtomobillərinin sahibləri və sürücüləri daha məsuliyyətli olmalı, küləkli hava şəraitində hərəkətin çətin və təhlükəli olduğunu unutmamalı, daşıdıqları yükün qablaşdırılmasına xüsusi diqqət yetirməlidirlər. Nəqliyyat vasitələrini sürüşmə, uçulma, qırılma, aşma ehtimalı yüksək olan obyektlərdən kənarda saxlanılmalı, park edərkən qapalı məkanlara üstünlük verilməlidir.

Piyadalar isə havanın küləkli və yağışlı olmasını nəzərə almalı, yollarda özlərinin və digər hərəkət iştirakçılarının həyat və sağlamlığına təhlükə yaradan davranışlardan çəkinməlidirlər.

Daxili İşlər Nazirliyinin (DİN) Mətbuat Xidmətinin şöbə rəisi, polis polkovnik-leytenantı Elşad Hacıyev Milli Məclisin deputatı Fazil Mustafanın paytaxtın Sabunçu rayonunda yaşadığı evin qarşısında odlu silahdan açılmış atəş nəticəsində xəsarət alması faktı ilə bağlı əhaliyə müraciət edib.

YazTV xəbər verir ki, müraciətdə deyilir:

"Millət vəkili Fazil Mustafaya qarşı törədilən cinayət faktı ilə bağlı rəsmi olaraq təsdiq olunmayan və dəqiqləşdirilməyən məlumatları yaymayın. Cinayəti törətməkdə şübhəli bilinən şəxsin, yaxud şəxslərin tutulması istiqamətində tədbirlər görülür".

Coca-Cola şirkətinin dəstəyi, Azərbaycan Dövlət Aqrar Universiteti, ABŞ Beynəlxalq İnkişaf Agentliyi (USAID) və İsrail Beynəlxalq İnkişaf Əməkdaşlıq Agentliyinin (MASHAV) tərəfdaşlığı ilə ağacəkmə kampaniyası keçirilib.

Novruz bayramı ərəfəsində keçirilən kampaniya Azərbaycan Dövlət Aqrar Universitetinin tələbələrinin və tərəfdaş qurumların nümayəndələrinin aktiv iştirakı ilə yekunlaşıb. Ağacəkmə kampaniyası çərçivəsində Universitetin Tədris-Təcrübə təsərrüfatı ərazisində 3400-dən çox meyvə ağacı əkilib.

Ağaclar üçün xüsusi damcı suvarma sistemi də qurulub. Kampaniya yaşıllıq zolağının genişləndirilməsi ilə yanaşı, suyun səmərəli istifadəsini də təmin edib.

Coca-Cola şirkətinin Qafqaz və Mərkəzi Asiya ölkələri üzrə ictimaiyyətlə əlaqələr və kommunikasiya direktoru Elşad Fərzəliyev həyata keçirdikləri ekoloji layihələr çərçivəsində 10 ilə yaxındır ki, müxtəlif ərazilərdə ağacəkmə kampaniyalarına dəstək olduqlarını bildirib:

“Coca-Cola Azərbaycanda yaşıllıq zolaqlarının mühafizəsi və bərpası istiqamətində müxtəlif ekoloji layihələr həyata keçirir. Şadıq ki, tərəfdaşlarımız sırasına Azərbaycan Dövləq Aqrar Universiteti də qoşuldu. İnanıram ki, ağacların əkildiyi bu ərazi tezliklə geniş yaşıllıq zolağına çevriləcək. Tərəfdaşlarımıza və kampaniyada iştirak edən hər kəsə təşəkkür edirəm”.

Qeyd edək ki, “Coca-Cola” Azərbaycan bundan əvvəl ADA Universiteti ilə birgə “Ağac ək, həyata hədiyyə et” layihəsini icra edib. Layihə Azərbaycanın müəyyən olunmuş ərazilərində təmiz su ehtiyatlarının qorunmasına və təchizinə nail olmaq üçün kütləvi meşəsalma və ağaclandırma məqsədilə təşkil edilib. 2014-cü ildən bəri keçirilən layihədə Bakı və ətraf ərazilərə 100 mindən çox ağac əkilib.

Neftçala rayonunda Ulu Öndər Heydər Əliyevin anadan olmasının 100 illik yubileyi ilə əlaqədar tədbirlər proqramına uyğun olaraq Neftçala rayon İcra Hakimiyyətinin və YAP Neftçala rayon təşkilatının birgə təşkilatçılığı ilə “Heydər Əliyev və Azərbaycançılıq məfkurəsi” mövzusunda elmi praktiki konfrans keçirilib.

Elmi praktiki konfransda Neftçala Rayon İcra Hakimiyyətinin başçısı Mirhəsən Seyidov, Azərbaycan Respublikasının 1-ci baş naziri, siyasətçi Həsən Həsənov, Yeni Azərbaycan Partiyasının veteranlar şurasının sədri Arif Rəhimzadə, Yeni Azərbaycan Partiyası veteranlar şurasının üzvü, yazıçı Tahir Məmmədov, kinorejissor, ssenarist, Azərbaycan Respublikasının xalq artisti Vaqif Mustafayev, RİH-in məsul şəxsləri, YAP Neftçala rayon təşkilatının, hüquq- mühafizə orqanlarının, idarə, müəssisə və təşkilatların rəhbərləri, şəhid ailələri, Vətən müharibəsi iştirakçıları və rayon ictimaiyyəti iştirak edib.

İlk öncə konfrans iştirakçıları Neftçala şəhərinin mərkəzindəki Ümummilli Lider Heydər Əliyevin əzəmətli heykəlini ziyarət edib, önünə gül dəstələri düzüb, ruhunu ehtiramla yad ediblər və Ulu Öndərin Heydər Əliyevin həyatını əks etdirən rəsm sərgisinə baxış keçiriblər.

Konfransda çıxış edən Neftçala rayon İcra Hakimiyyətinin başçısı Mirhəsən Seyidov Ümummilli Lider Heydər Əliyevin Azərbaycan xalqının və dövlətçilik fəaliyyətində müstəsna xidmətləri olan bir şəxsiyyət olduğunu, sovetlər birliyinin dağılmasından və Azərbaycanın müstəqillik əldə etməsindən sonra dilindən, dinindən və milli-mənəvi dəyərlərindən asılı olmayaraq bütövlükdə dövlətçilik ənənələrinin formalaşdırılmasında mühüm işlər görən Ulu Öndər Heydər Əliyevin 1990-cı illərin əvvəllərindən başlayaraq ölkəmizdə yeni istifadə edilərək inkişaf etdirilən azərbaycançılıq ideologiyasının mühüm elementlərinin inkişaf etdirilməsində əvəzsiz işlər görməklə tarixə düşməsini, azərbaycançılıq ideologiyası xüsusən də yeni müstəqillik əldə edən respublikanın hüquqi və demokratik dövlət kimi möhkəmləndirilməsi, inkişaf etdirilməsi üçün Ulu Öndər tərəfindən irəli sürülən əvəzedilməz bir ideologiyaya çevrilməsini iştirakçıların diqqətinə çatdırıb. RİH-in başçısı bildirdi ki, Ulu Öndər Heydər Əliyevin dediyi kimi: Hər bir azərbaycanlı öz milli mənsubiyyətinə görə qürur hissi keçirməlidir və azərbaycançılığı - Azərbaycan dilini, mədəniyyətini, milli-mənəvi dəyərlərini, adət-ənənələrini yaşatmalıdır!

Elmi praktiki konfrans qonaqların iştirakı ilə onların Ulu Öndər Heydər Əliyev haqqında xatirələri və sual-cavab formatında davam edib.

Dünən terror hücumuna məruz qalan millət vəkili Fazil Mustafa hadisə ilə bağlı ilk açıqlama verib.

O, "Haqqın.az" saytının rəhbəri Eynulla Fətullayev ilə əlaqə saxlayıb.

F. Mustafa jurnalistə açıqlamasında bunları deyib:

"Evə qədər sürdüm. Maşını qaraja daxil etmək istəyəndə birdən nə olduğunu başa düşmədim. Pultun düyməsini sıxıb qaraja daxil olmağa hazırlaşırdım. Birdən maşının “podpres”i silkələndi. Çiynimdə dəhşətli ağrı hiss eləyirdim. Ağrılardan sonra bunun atəş zərbəsi olduğunu anladım, çünki atəş səslərini eşitdim. Qapını açıb düşdüm. Darvazaya tərəf bir neçə addım atanda artıq ikinci güllə mənə dəydi. Ayağımdan yaralandım. Evə gedərək tez qapını bağladım".

Millət vəkilinin sözlərinə görə, sonra qapını bağlayaraq Təcili yardım və hüquq mühafizə orqanlarına məlumat veriblər: "Təcili yardım maşınında özümü təhlükəsiz hiss edəcəyim xəstəxanaya aparılmağı xahiş etdim. Amma çox qan itirmişdim. Bədənim əsirdi. Daha heç nə xatırlamıram".

Danışıq zamanı F. Mustafanın həyat yoldaşı və oğlu da yanında imiş. Həyat yoldaşı əlavə edib ki, atışma qorxulu olub. Fazil Mustafa isə möcüzə baş verdiyini əlavə edir: “Özüm də başa düşmədim ki, necə sağ qaldım. Allah saxladı. Möcüzə oldu”.

Xatırladaq ki, dünən Zabrat qəsəbəsində yerləşən evinin qarşısında silahlı hücuma məruz qalan millət vəkilinə avtomat silahdan çoxsaylı atəş açılıb. F.Mustafa iki güllə yarası alıb. Çiyin nayihəsindən və ayağından yaralanan millət vəkilinə ilk olaraq Kliniki Tibbi Mərkəzdə (Semaşko) həkim müdaxiləsi edilib. Sonra isə deputatın təhlükəsizliyinin daha yaxşı təşkil olunması məqsədilə o, hüquq-mühafizə qurumlarından birinin hospitalına aparılıb.

Azərbaycanda martın 24-də gözlənilən hava şəraiti açıqlanıb.

Milli Hidrometeorologiya Xidmətindən  verilən məlumata görə, Bakıda və Abşeron yarımadasında hava dəyişkən buludlu olacaq.

Əsasən yağmursuz keçəcək. Gecə və səhər bəzi yerlərdə duman olacaq. Cənub küləyi əsəcək.
Ətraflı

Havanın temperaturu gecə 7-10° isti, gündüz 15-20° isti olacaq. Atmosfer təzyiqi 763 mm civə sütunu olacaq. Nisbi rütubət 60-70 % olacaq.
Azərbaycanın rayonlarında havanın əsasən yağmursuz olacağı, lakin gündüz bəzi dağlıq ərazilərdə arabir yağıntıl olacağı gözlənilir. Ayrı-ayrı yerlərdə arabir duman olacaq. Qərb küləyi əsəcək.

Havanın temperaturu gecə 6-11° isti, gündüz 18-23° isti, dağlarda gecə 1° şaxtadan 4°-dək isti, gündüz 5-10° isti olacaq.

Azərbaycan Dövlət Aqrar Universitetində (ADAU) Ümummilli Lider Heydər Əliyevin 100 illik yubileyinə həsr olunan “Tətbiqi elmlər və aqrar sahənin inkişafına yeni baxışlar və yanaşmalar” mövzusunda Respublika elmi-praktik konfransı keçirilib. 

Konfrans iştirakçıları əvvəlcə Ulu Öndər Heydər Əliyevin ADAU-da yerləşən büstü önünə tər çiçəklər düzüblər.

Tədbir Ulu Öndər Heydər Əliyevin və torpaqlarımızın bütövlüyü uğrunda canlarından keçən şəhidlərin əziz xatirəsinin yad olunması ilə başlayıb.

Konfransı açıq elan edən Universitetin rektor vəzifəsini icra edən Zəfər Qurbanov Ulu Öndər Heydər Əliyevin xalqın təkidli istəyi ilə 1993-cü ilin iyununda hakimiyyətə gəlişindən sonra bir çox sahələr kimi kənd təsərrüfatında da 90-cı illərin əvvəllərindən özünü kəskin büruzə verən tənəzzül meyillərinin aradan qaldırılıb, səmərəli islahatların əsasının qoyulduğunu deyib. Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində ölkəmizdə iqtisadiyyatın digər sahələri kimi, aqrar sahə də sürətlə inkişaf etməkdədir.

Çıxış edən Gəncə Şəhər İcra Hakimiyyətinin başçısı Niyazi Bayramov 1969-1982-ci illərdə Heydər Əliyevin yüksək idarəçilik qabiliyyəti nəticəsində Azərbaycanda kənd təsərrüfatının bütün sahələrində əsaslı dönüş yarandığını və Ümummilli Liderin ölkəmizdə ikinci dəfə hakimiyyətə gəlişi ilə az bir zamanda iqtisadi tərəqqinin əldə edildiyini diqqətə çatdırıb.

Sonra Ulu Öndər Heydər Əliyevin ölkəmizdə kənd təsərrüfatının inkişafı ilə bağlı gördüyü işlərdən bəhs edən videoçarx konfrans iştirakçılarına nümayiş olunub.

Daha sonra Meyvəçilik və Çayçılıq ET İnstitutunun direktoru İlham Qaraqurbanlı “Seleksiya-toxumçuluq işlərinə ənənəvi və müasir yanaşmalar”, Üzümçülük və Şərabçılıq ET İnstitutunun direktoru Vüqar Səlimov “İnnovativ becərilmə texnologiyası, mühafizəsi və aqroekologiyası”, Tərəvəzçilik ET İnstitutu Publik Hüquqi Şəxs İdarə Heyətinin sədri Elmar Allahverdiyevin “Seleksiyası, fiziologiyası və toxumçuluğu” və ADAU-nun Bağçılıq kafedrasının müdiri Allahverdi Seyidovun “Bağçılıqda kadr hazırlığı” mövzularında çıxışları dinlənilib. 

Konfrans işini panel müzakirələrlə davam etdirib. 

Neftçala rayonunda Yeni Azərbaycan Partiyasının Neftçala rayon təşkilatının yaradılmasının 30 illiyi Neftçala Rayon İcra Hakimiyyətinin dəstəyi və YAP Neftçala rayon təşkilatının təşkilatçılığı ilə geniş formada qeyd olunub.

Tədbirdə Neftçala Rayon İcra Hakimiyyətinin başçısı Mirhəsən Seyidov, RİH-in məsul şəxsləri, YAP Neftçala rayon təşkilatının, hüquq- mühafizə orqanlarının rəhbərləri, şəhid ailələri, partiya veteranları və ilk ərazi partiya təşkilatlarının üzvləri iştirak edib.
İlk öncə tədbir iştirakçıları Neftçala şəhərinin mərkəzindəki Ümummilli Lider Heydər Əliyevin əzəmətli heykəlini ziyarət edib, önünə gül dəstələri düzüb və ruhunu ehtiramla yad ediblər.

Tədbirdə Ulu Öndər Heydər Əliyevin, Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan hərbi qulluqçuların və vəfat edən partiya üzvlərinin əziz xatirəsi bir dəqiqəlik sükutla yad olunub.

Tədbirdə çıxış edən YAP Neftçala rayon təşkilatının sədri Ülvi Fərzəliyev, partiyanın veteran üzvləri Oktay Kərimov, Valeh Tağıyev, şəhər 4 saylı partiya təşkilatının sədri Şəfəq Balaşova və partiya sıralarına yeni qoşulan gənc Xancanlı İlkin 1992-ci ilin oktyabrında bir qrup Azərbaycan ziyalısı Ulu Öndər Heydər Əliyevə müraciət edərək Yeni Azərbaycan Partiyasının yaradılmasını təklif edib və Ulu Öndər Heydər Əliyevin 24 oktyabr tarixli cavab məktubu ilə Yeni Azərbaycan Partiyasının yaradılmasına və ona rəhbərlik etməyə razılıq verib. 1992-ci il noyabrın 21-də Ulu Öndər Heydər Əliyevin sədrliyi ilə Yeni Azərbaycan Partiyasının təsis konfransının keçirilməsi yeni müstəqil Azərbaycanın tarixində parlaq gələcəyin əsasını qoydu. Yeni Azərbaycan Partiyasının qısa müddətdə xalqın sevimli partiyasına çevrilməsinin isə tək bir səbəbi var idi - xalqın partiyanın sədrinə olan sevgisi və inamıdır. Zaman göstərdi ki, xalq Heydər Əliyevə arxalanmaqla, onun ətrafında sıx birləşməklə öz uğurlu gələcəyini təmin etdi.

Çıxış edən Neftçala Rayon İcra Hakimiyyətinin başçısı Mirhəsən Seyidov Ulu Öndərin hakimiyyətə qayıdışı ilə ölkədə vətəndaş müharibəsi təhlükəsinin qarşısının alınması, daxili və xarici bədxahların Azərbaycanı parçalamaq, dövlətçiliyimizi məhv etmək istiqamətindəki bütün cəhdlərinin qarşısı alındı. Heydər Əliyev öz qayıdışı ilə Azərbaycana sülh, sabitlik, dirçəliş və fasiləsiz inkişaf gətirdi və cəmiyyətin hər bir üzvündə dövlətimizin yenilməzliyi ilə bağlı böyük əminlik yarandı. Ulu Öndər partiyanın uğurlu gələcəyini onun yaradılmasının ilk illərindən görürdü. O, müasir Azərbaycanın davamlı və nəhəng uğurlara imza atacağından əmin idi. Ümummilli lider Heydər Əliyev partiyanın yaradılmasının onuncu ildönümü ilə bağlı tədbirdə deyib: “Müstəqil Azərbaycan yeni Azərbaycandır. Müstəqil Azərbaycanda yeni ictimai-siyasi quruluş yaranıbdır. Yeni iqtisadiyyat formaları yaranıb, demokratiya, siyasi plüralizm inkişaf edir. Belə bir yeni Azərbaycan keçmişdə yaşadığımız, keçmişdə olan Azərbaycandan fərqlidir. Ona görə partiyamızın adı da Yeni Azərbaycan Partiyasıdır. Məhz Yeni Azərbaycan Partiyası müstəqil Azərbaycanı müstəqillik yolunda inkişaf etdirməyə qadir bir partiyadır”.
Ulu Öndər Heydər Əliyevin dediyi kimi, Yeni Azərbaycan Partiyası öz fəaliyyəti ilə sübuta yetirdi ki, o, məhz yeni müstəqil Azərbaycanı qurmağa, onu zirvələrə, parlaq gələcəyə daşımağa qadir partiyadır.

Tədbirin sonunda Yeni Azərbaycan Partiyası sıralarına qoşulan bir qrup partiya üzvünə partiya biletləri və YAP Neftçala rayon təşkilatında səmərəli fəaliyyətinə görə bir qrup şəxslərə fəxri fərmanlar təqdim olunub.

Avtoqəzada həlak olan tanınmış prodüser Oqtay Əliyev dəfn olunur.

Onun nəşi “Qurd qapısı” qəbiristanlığına gətirilib.

Oqtay Əliyevin məzarı iki ay öncə vəfat edən Əməkdar artist Tünzalə Əliyevanın məzarının arxa hissəsində qazılıb. Eyni zamanda, burada Xalq artistləri Arif Quliyev, Rafiq Hüseynov (Rəmiş), Ramiz Novruz və digər mərhum sənətçilərin məzarları yerləşir.

***

Mərhum “Qurd qapısı” qəbiristanlığında torpağa tapşırılıb,dəfn prosesi başa çatıb.